Diego de Cuba tocante negociacion CAO:
- Tin ocho luna largo den deliberacion!
ORANJESTAD (AAN): Ainda Sindicato STA, lidera pa Diego di Cuba, ta sigui reuniendo cu NV Elmar, ya pa un transcurso di ocho luna caba.
Diego de Cuba, den un entrevista a indica cu e reunionnan aki ta pa trata e Contrato Colectivo nobo, pa e empleadonan di e compania aki.
El a duna di conoce cu mirando con e reunionnan ta bay e conclusion ta cu e partidonan ta hopi leu for di otro, y nan no ta bay yega na otro mirando locual cu NV Elmar a presenta.
STA a manda un proposicion pa loke ta e Contrato Colectivo, apart di loke ta e structura di e trahadornan cual ta e deseo di e trahadornan, pero a ricibi un contra proposicion di NV Elmar, unda cu nan ta desea cierto cambionan riba cierto articulonan, pero ni esey nos no por a atende.
Diego de Cuba a bisa cu caminda cu e ta kere cu e “rabo di porco ta kreul” ta e structura salarial nobo, unda tin casi 70% di e empleadonan cu lo ta den nan maximum caba of a surpase. Esaki ta nifica cu e personanan aki den futuro lo no bay conoce ningun aumento mas. E ta puntra ta ki motivacion e trahadornan aki ta bay tin pa nan yega na pia di trabao si nan sa cu nan tin cu bay keda struggle. Tin trahadornan den edadnan di 40 pa 45 aña cu lo tin cu lastra 25 aña mas cu e mesun salario y esaki no ta stimula nan pa ta productivo.
El a agrega cu compara cu WEB Aruba NV y Setar NV, NV Elmar a keda hopi atras den structura di salario, y e ta puntra su mes pakico e no tin e mesun structura cu e companianan menciona of alomenos algo similar, pa nan haya oportunidad pa por sigui crece tambe.
STA a manda un carta pa gerencia NV Elmar riba esaki y su contesta ta cu no, cu nan ta un compania cu un structura diferente y nan no por bay den e direccion di e otro companianan, y esaki no ta convence e sindicatonan pasobra nan ta companianan di utilidad.
De Cuba a expresa cu hopi biaha e opinion publico ta duro cu e trahadornan di NV Elmar y ta bisa cu nan ta gana un gran cantidad di placa, pero si mira e situacion berdadero di pais Aruba, e trahadornan di Elmar, cu excepcion di esnan den top cu ta gana salarionan hopi halto, ta bon pa nan funcion. Den e top unda e compania mester haci su huiswerk primordialmente, y no den e trahadornan den veld. Den veld nan no ta tumando trahador nobo, pero toch por mira cu cada bez tin hende ta drenta, mientras no tin trahador pa traha riba caya.
El subraya cu mayoria di e trahadornan cu ta traha cu coriente mes nan trabao ta sumamente peligroso y nan bida ta na riesgo constantemente. Un fout chikito y e persona por bay. Tin varios di e trahadornan aki cu a sufri lesion na pia di trabao y danki DIOS mayoria di nan a sobrebibi pero tin di nan cu no a keda bon mas.
