ORANJESTAD (AAN): Un grupo di experto riba energia Ember ta remarca cu Union Europeo (UE) ta riba caminda pa un "colapso grandi" den uso di energia fosil e aña aki.
Segun e expertonan aki, durante luna di Mei, energia Solar y di Biento a produci mas energia den UE cu tur fuente di energia fosil hunto.
Den luna di Mei, energia solar y di biento a produci mas electricidad cu tur combustibel fosil combina, marcando e prome biaha cu energia renovabel a supera fuentenan tradicional pa un luna completo. Practicamente un tercera parti di electricidad di UE a bin di biento y solo, mientras cu e cantidad di combustibel fosil uza a cay na un nivel record di 27 porciento.
Varios factor a contribui na e crecemento di energia renovabel den UE. Particularmente energia Solar a mira un crecemento substancial, representando 14 porciento di e electricidad di UE na Mei, superando energia di carbon pa prome biaha. E energia di Biento tambe a crece compara cu e aña anterior, aunke e no a yega na e record cu a worde estableci na Januari.
E impulso pa instala fuentenan nobo di energia renovabel a causa un disminucion den e produccion di combustibel fosil for di luna di Januari te cu Mei.
Varios pais di Union Europeo a hunga un rol importante den e transicion pa energia renovabel. Por ehempel, Portugal a instala un cantidad significante di 0.9GW di energia Solar fotovoltaico na aña 2022, aumentando su capacidad solar y genera mas di 50 porciento pa 2.5GW cual ta suficiente pa cubri necesidad di energia di mas o menos 1 miyon di hogar. Otro nacionan manera Spaña, Suecia y Belgica tambe a logra record di energia renovabel e aña aki.
Como resultado di e desaroyonan aki, e poder di combustibel fosil ta baha continuamente den Union Europeo. Produccion di carbon a baha na apenas 10 porciento, y gas a yega na su parti mas abou desde 2018 na 15 porciento. E tendencia aki ta continua desde fin di 2022 y a continua den e prome lunanan di e aña aki. Hasta paisnan manera Alemania y Polonia, cu historicamente a depende di carbon, a nota un disminucion significativo den generacion di energia di carbon.
E uzo di gas tambe ta bahando. Biento y Solo a bira e fuentenan di energia mas importante di e UE na 2022, y ta yuda e “bloc” Europeo evita un asina yama "triple crisis" cu ta encera e suministro di gas Ruso, problemanan di energia hidro-electrico pa motibo di secura y interupcion nuclear inespera. Italia ta considerando pa cera su stacionnan di coriente cu ta traha cu carbon na aña 2024, si e prijsnan di gas keda abao.
Pa resumi, e transicion di energia di UE ta acelera, y energia di Biento y Solar ta birando e fundeshi di sistema di electricidad di futuro, superando fuente di combustible fosil den produccion di electricidad y ta contribui na un reduccion significante den nan uzo di fossil den henter region. Aruba tin Solo y Biento na abundancia, nos ta spera di tende pronto mas detaye di Aruba su plan pa genera mas energia renovabel pa asina costo di energia por baha pero tambe cu Aruba ta contribui den forma mas substancial na un mundo cu menos contaminacion.
