Awe La Sonora Matancera ta cumpli 100 aña di historia y ritmo cubano

Nan a wordo funda na 1924...

ORANJESTAD (AAN): Tabata riba e fecha 12 di Januari 1924 na e ciudad di Matanzas na Cuba, na cas di e musico di cuerda Valentín Cané, a nace un grupo musical den estilo di septeto di guitara, trompet, y percussion menor cu e intencion di acompaña e reunionnan publico di cierto partido politico local.  Di eynan su prome nomber tabata ‘Tuna Liberal’.  E co-fundador tabata Pablo Vasquez, y e otro tabata Rogelio Martinez kende despues a bira director.

   Na aña 1926, nan a cambia nan nomber pa ‘Sexteto Soprano’, y despues ora di a viaha pa Havana na 1928, y como un forma pa recorda nan origen, e nomber a cambia pa ‘Estudiantina Sonora Matancera’.  Na 1928 na Havana, nan a graba nan prome disco bao di e sello disquero di RCA Victor, y a graba e cancionnan “El porqué de tus ojos”, “Fuera, fuera, chino”, “Cotorrita”, “Eres bella como el sol”, “A mi Cuba”, “No te equivoques conmigo”, “De Oriente a Occidente”, “Matanzas, tierra del fuego.”

   Na aña 1930, e grupo aki a cuminsa toca regularmente na e emisora Radio Progreso di Cuba, danki na un programa cu nan tabatin eynan.  Y aki ta unda cu nan popularidad a crece inmensamente.  E grupo a adapta e ritmonan nobo den e epoca ey, manera danzon, e cha cha cha, jazz, y tambe swing.  A incorpora instrumentonan nobo manera piano, saxofon, clarinet, bongo, conga, y guiro.  Nan a bira asina grandi, cu hamas e tres fundadornan y demas integrante lo por a pensa cu 100 aña despues, cu e nomber di ‘La Sonora Matancera’, cu mundo henter lo bay ta recordando nan e siman aki como un di e orkestanan latino mas importante pa mundo, cu tabata generador di talento y responsable di un sonido, un repertorio, y un forma hopi imita, pero imposible di iguala.

   Na comienso di 1950, nan a a bandona RCA Victor, y a cuminsa produci disco riba e sello disquero ‘Panart’, y despues tambe cu e sello ‘Seeco’.

   La Sonora Matancera tabatin total di riba 30 cantante talentoso, y mayoria di nan a cosecha esaki cantando pa e grupo, manera e cubanonan Celia Cruz, Bienvenido Granda, Vicentico Valdés, Alberto Pérez, Justo Betancourt, Miguelito Valdés, y Celio González.

   Tambe cantantenan di Puerto Rico, manera Daniel Santos, Myrta Silva, Carmen Delia Dipiní, Bobby Capó, y Yayo el Indio.  For di Argentina a sobresali cantantenan Leo Marini, Carlos Torres, y Chito Galindo.  Di Mexico a sobresali Toña la Negra, y Emilio Dominguez.  Di Republica Dominicana por corda Alberto Beltrán kende a canta ‘Aunque me cuesta la vida’.

   Sin lubida e cantante Victor Piñero di Venezuela, y dos grandi di Colombia, esta Nelson Pinedo di Barranquilla, y Gladys Julio di Cartagena.   Por corda con Victor Piñero despues a canta cu Los Melodicos na Venezuela y a fayece net despues di a duna presentacion riba escenario.

   Tur e cantantenan ey bao di e direccion eterno, desde 1948 te cu poco prome cu su fayecimento na 2001, di e guitarista, cantante y empresario Rogelio Martínez Diaz.  Sin lubida riba Lino Frias, kende tabata un di e mihor pianistanan di mundo y a toca pa La Sonora Matancera.

   Bishitanan na Aruba: Den siglo pasa, Aruba tabatin hopi suerte di por a ricibi e grupo di La Sonora Matancera di bishita pa asina presenta y laga pueblo di Aruba balia sin fin.  Na Aruba e grupo talentoso aki a duna presentacion na e.o. Club La Fama, tambe a toca na tereno di Aruba Juniors, y tambe a toca na Club Caribe unda entrada tabata 5 Florin.

   Nan a bishita demas islanan di Antiyas Hulandes, y na 1957 e grupo a hasta lanza e disco ‘Mi So Den Boso’, componi pa Ludwig Samson y canta pa Celia Cruz den ritmo di tambu y bendi riba disconan di sello disquero Seeco na 78 RPM.

   Nan centenario: Specialmente pa e fecha di awe Diabierna dia 12 di Januari, varios emisora rond mundo ta preparando pa presenta un ‘maraton’ di cancionnan di Sonora Matancera.  Por ehemplo na pais bisiña, e emisora Radio Nacional de Colombia lo dedica seis ora largo cu nan cancionnan, nan historia, y e mihor di nan repertorio.

   Varios observador ta indica cu La Sonora Matancera ta uno cu a kibra record.  Pasobra ningun otro orkesta a keda mantene su mes na bida pa un siglo.  E musica di nan merece di wordo reconoci y celebra pa tur amante di bon musica.

   DIARIO ta gradici e discografo local Rafael Kelly, cu a yuda cu e informacionnan aki.