Ministro Geoffrey Wever:
ORANJESTAD (AAN): Riba Diahuebs durante un Openbare Bijeenkomst Minister Geoffrey Wever hunto cu Departamento di Asuntonan Economico, Comercio y Industria a duna Parlamento di Aruba un update di e Economic Outlook 2023-2024.
Manera indica durante tratamento di presupuesto 2024 di Pais Aruba den december 2023, e update aki ta representa un ahustacion di e Economic Outlook 2023-2024 publica den juni 2023 y ta basa riba ultimo informacion disponibel di nos economia.
Den e Economic Outlook di juni 2023 Departamento di Asuntonan Economico, Comercio y Industria a premira un crecemento economico di 10.1 porciento nominal den 2023 di 10.1% y pa 2024 un crecemento di nos economia cu 4.6 porciento nominal.
Segun e December Economic Outlook 2023- 2024 Departamento di Asuntonan Economico, Comercio y Industria ta ahusta e proyeccion di crecemento di economia di Arubapa 2023. Basa riba analisis di ultimo lunanan di 2023, ta premira cu nos economia a crece cu 13.7 porciento pa yega un balor di 6.8 miljard Florin, esaki ta igual na 112.1 porciento di e nivel di 2019 (6.0 miljard Florin).
Pa 2024 segun calculacionnan di Departamento di Asuntonan Economico, Comercio y Industria ta premira un crecemento di 3.0 porciento den termino nominal di e Producto Interno Bruto (PIB), e indicador pa midi actividad economico. Cu un balor di 7.0 miljard Florin, esaki ta igual na 115,5% porciento di e nivel na 2019 (6.0 miljard Florin).
E expansion di actividadnan economico pa 2024 ta basa riba crecemento di nos industria turistico y crecemento di consumo y inversion priva. Esaki ta demostra confianza den nos isla como destinacion turistico y pa inversion. E revision di proyeccion di crecemento di economia di Aruba ta den liña cu e ultimo di expectativa economico di Centrale Bank van Aruba cu ta premira un crecemento economico di 4.0 porciento den termino nominal den 2024.
Pa facilita proyeccion di e economia di Aruba, DEACI ta haci uzo di e modelo macro-economico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba. Maneho di e modelo MARUBA ta cay bao responsabilidad di DEACI. Pa yega na e proyeccionnan economico, DEACI ta den dialogo continuo cu diferente instancianan y expertonan local, y a base di analisis di diferente desaroyo, ta produci proyeccionnan economico.
Ministerio di Asuntonan Economico, Comunicacion y Desaroyo Sostenibel conhuntamente cu Departamento di Asuntonan Economico, Commercio y Industria lo sigui monitor desaroyo di economia di Aruba.
Minister Geoffrey Wever kier gradici directora Maria Dijkhoff- Pita y e afdeling Economisch Beleid en Onderzoek cu ta haci e economic outlook posibel. E publicacion completo ta disponibel riba e website www.deaci.aw.
