ORANJESTAD (AAN): World Wetlands Day, esta Dia Mundial di Zonanan Humedo ta ser celebra door di Nacionan Uni riba 2 Februari.
E conmemoracion aki ta sirbi pa crea concientisacion pa e importancia di zonanan humedo.
Segun e organisacion local Rainbow Warriors Core Foundation, e zonanan humedo ta sostene ecosistemanan vital y ta mantene biodiversidad y na Aruba ta inclui rooi, saliña, laguna, area di mangel, pasto marino (seagrass beds) y rif di coral.
Tema pa 2024: E aña aki pa Zonanan Humedo y Bienestar Humano, e Secretariado di e Tratado pa Zonanan Humedo, (RAMSAR Convention on Wetlands), ta invita un y tur pa uni na e mensahe pa 2024 pa World Wetlands Day, cu ta “Wetlands and Human Wellbeing”, esta “Zonanan Humedo y Bienestar Humano”.
Esaki ta e mensahe di Musonda Mumba, kende ta secretario general, Tratado di Ramsar: Zonanan humedo, ser humano y bida ta conecta. Zonanan humedo ta forma parti central di nos bienestar. Sea mediante e awa dushi cu nan ta provee, actuando como fuente di alimento of protehando nos di eventonan di tempo y clima extremo, zonanan humedo saludabel ta equivalente na nos bienestar.
Dia Mundial di Zonanan Humedo ta ser celebra cada aña di 2 februari. E comemoracion aki ta sirbi pa crea concientisacion di e importancia critico di zonanan humedo. Den tur skina di mundo ser humano pa siglonan a depende di zonanan humedo pa nan subsistencia, porvenir, inspiracion y di e resiliencia di e zonanan ambiental aki importante.
Apesar di e numeroso beneficio pa ser humano obteni di zonanan humedo, tur dia e zonanan aki ta ser haci daño pa ser humano. Zonanan humedo ta ser destrui pa practica no sostenibel di agricultura, cual ta un causa principal di perdida di zonanan humedo mediante drenahe di awa y dempelmento cu tera. Hopi zona humedo, particularmente cerca di ciudad tambe ta ser contamina pa actividad humano y degrada pa polucion di plastico, locual ta empeora e triple crisis planetario di cambio climatico, perdida di naturaleza y polucion, ultimamente afectando salud humano.
E tendencianan actual di establecimento di ser humano ta crea un menaza mayor pa e conservacion y utilizacion racional di zonanan humedo den y cerca di ciudadnan creciente. Ora ciudadnan expande e tendencia ta pa invadi zonanan humedo y esakinan ta desapareciendo tres biaha mas rapido cu boskenan. Pesey nos mester stop e destruccion y encurasha accion pa conserva y restora e ecosistemanan vital aki.
E Secretariado pa e Tratado RAMSAR ta invita bo pa uni na e celebracion di 2 februari 2024. E tema pa 2024 ta “Zonanan Humedo y Bienestar Humano”. Y cu solamente seis aña mas pa cumpli cu e Obhetivonan di Desaroyo Sostenibel (SDGs) na 2030, tin un necesidad urgente pa actua awor.
Pa Dia Mundial di Zonanan Humedo 2024, mi ta invita bo pa tuma accion des tres forma:
(1) Haci escogencia conciente pa stop contaminacion di zonanan humedo.
(2) Tuma parti den esfuerzon global pa conserva y utiliza sostenibelmente zonanan humedo.
(3) Participa den esfuerzonan local pa restoracion di zonanan humedo.
Situacion na Aruba: E problema principal di Aruba pa loke ta zonanan humedo ta e falta di un ordenanza nacional pa medio ambiente (Landsverordening Milieubeheer). Consecuentemente e obligacion pa haci estudio di impacto ambiental no ta regla pa ley y ta legislacion pa proteccion di naturaleza so por ser aplica.
Den e periodo 2005-2009 pa extende e periodo pa utilizacion di dump di Parkietenbos a designa gran parti di e area di mangel banda di e dump original pa ser converti den celnan pa dera sushi.
Den un tesis pa Bachelors Degree di 2015 di studiante Rikkert Loosveld di University College Utrecht, titula “Improper waste management and the increasing threat to the Aruban economy. An assessment of adverse effects of antrhopogenic disturbances on the Parkietenbos mangroves of Aruba” ta documenta extensamente e daño haci y e contaminacion den y rond e mangelnan cu a keda na Parkietenbos y e ambiente marino di full e costa sur di Aruba pabou di e dump.
Construccion di e brug nobo pa Green Corridor Aruba, cu tabata rekiri pone pilon pa e brug meimei di mangelnan den e area proteha di Spaans Lagoen, registra como RAMSAR wetland segun e Tratado pa Zonanan Humedo, a kap mangel, pero a planta e equivalente di e area perdi di mangel back den e mesun area. Den e mesun area di Spaans Lagoen sinembargo a permiti construccion sin ningun permiso of estudio di impacto ambiental di e Balashi Cabins.
Den area di Pos Chikito y Savaneta a permiti kapmento di mangel pa casnan y proyectonan super luhoso pa turismo ser construi, mayoria di nan construi pa habitante/comerciante stranhero.
Na Santo Largo y Mangel Halto Gobierno tin planea pa amplia infrastructura pa ricibi turista, pero e embeyecimiento aki lo bay afecta negativamente e mangelnan den e areanan aki.
Den e area cu ta corre for di comienzo di pista di aeropuerto te cu dump di Parkietenbos a kap mangel tanto riba tereno di aeropuerto y pa ampliacion di e marina na unda tin un monton di yate y barco mara y a lo largo di Bucutiweg completo y e parti di costa dilanti Kas Paloma a permiti un free for all di construccion di pier, unda a construi meimei di mangelnan y a kap mangel na gran escala.
Hasta den e area cu ta corre for di Eagle Beach te e actual area for di Divi Phoenix te Hilton na otro banda di e caminda principal a kap mangel of altera tereno di mangel, y den full e banda pabou di Bubaliplas areanan di mangel a keda afecta pa construccion di e hotenan den e area aki.
Den e Landsbesluit di 5 mei 2020 (AB 2020, no.67) un cantidad di area nobo a keda declara area proteha y poni bou maneho di Fundacion Parke Nacional Aruba.
Segun Landsbesluit inheemse flora en fauna, 8 augustus 2017 (AB 2017, no.48) den articulo 2, a base di articulo 4, inciso 2, sub a di Landsverordening Natuurbescherming (AB 1995, no.2) a declara tur cuater tipo di mangel na Aruba como especie proteha y segun articulo 6, inciso 2 di Landsverordening Natuurbescherming ta prohibi pa kita parcialmente, por completo of daña mangel. Mester constata cu casi tur caminda ta viola proteccion di (area di) mangel, esta zonanan humedo.
Recientemente a surgi e problema di creaccion di un beach pa Embassy Suites cu a ser para pa via di proteccion di mangelnan y yerba di laman.
Pero mester constata cu e problematica di e planta di purificacion na Bubali RWZI y maneho sano di e zonanan humedo den e proyecto Western Wetlands den cual pa diferente zona humedo incluyendo e Bubaliplas a pidi status di zona colectivo proteha den Tratado RAMSAR, ta mustra cu falta hopi pa un adecuado maneho di zonanan humedo na Aruba tuma lugar.
