Como 155 kg cocaina cu bal 4.6 miyon Dollar - ORANJESTAD (AAN): Tin un fluho di droga e ultimo lunanan aki, cu ta move for di costa di Colombia y ta bay sea rumbo pa Republica Dominicana of trata di drenta direct den Puerto Rico.
Pero autoridadnan den Caribe tin avion, guardacosta, y demas inteligencia ta busca pa intercepta e botonan aki.
Riba Dialuna cu a pasa, ora cu un speedboat a wordo detecta ta yegando costa zuidwest di Puerto Rico, mesora a bati alarma na US Border Patrol, y tambe e Forza Uni di Accion Rapido (FURA) di Puerto Rico. Nan a logra di ataca di tur angulo e boto aki, y asina a logra intercepta un cargamento di 155 kilo di cocaina, cu nan tabata trata di drenta como contrabanda via Cabo Rojo. E cocaina aki riba caya tin balor di 4.6 miyon Dollar.
E speedboat a wordo detecta den e sector Joyuda di Cabo Rojo, y aki a logra aresta un homber Dominicano. Nan a descubri 7 bala grandi cu tabata contene 136 paki yena cu cocaina. E cocaina aki a bin for di Colombia y sea a haci un ‘transito’ na Republica Dominicana of a bay directo pa Puerto Rico.
Unidad di investigacion di Homeland Security, y tambe Drug Enforcement Agency a asumi custodia di esun deteni, y tambe e droga pa investigacion. Aki lo bay haya sa si acaso el a bin direct di Colombia of no.
Tin di corda con dia 5 di Mei cu a pasa, Border Patrol y Polis di Puerto Rico a intercepta un boto den cual cuatro Dominicano tabata transportando 209 kilo di cocaina, y tabata trata di drenta esaki via Cabo Rojo. E tempo ey e droga ey tabatin balor di 6.2 miyon Dollar.
Riba e potret por mira e cantidad di droga cu a wordo confisca.
