Keda cla cu MAVO den apenas 2 aña...
ORANJESTAD (AAN): Dialuna mainta durante un conferencia di prensa teni, a anuncia cu entrante Diabierna awor, e chens ta habri atrobe pa inscribi pa sigui lesnan di Avond-MAVO na Aruba.
Natalie Geerman kende ta Directora di Avond MAVO Aruba, a indica cu inscripcion lo cuminza 1 Juli 2022, y lo sigui te dia 7 di Juli 2022.
Tur hende cu tin interes pa sigui studia, por bay inscribi tambe na avondmavoaruba.com y aki bo ta haya tur informacion di loke bo tin di haci pa inscribi bo mes online.
Ta necesario pa bo tin un rapport, of un SE-Kaart, of un cijferlijst di añanan anterior, y bo tin mester di papel di Censo, un cedula, y tambe e prueba di pago di ‘Schoolgeld’.
E website ta yuda cada studiante haya sa, cuanto e suma di placa ta bira.
Fast Track Trajekt: E aña aki tambe, Avond MAVO ta introduci un trayecto cu yama ‘Fast Track Trajekt’, cu tin como meta pa yuda e studiante finaliza MAVO den un forma acelera.
Avond MAVO semper ta consisti di 3 aña di estudio. Bo tin Leerjaar-2, Leerjaar-3, y Leerjaar-4. Pero si bo haci bo best y drenta den 2e, bo por finaliza bo Avond MAVO den apenas 2 aña.
E aña escolar cu ta finalizando a trece hopi bon resultado pa e alumnonan di Avond MAVO. Segun Geerman, nan ta masha contento mes cu e resultado di 2021-2022. El a splica cu tabatin un total di 10 alumno cu a logra di ‘bula’ di Leerjaar-2 pa Leerjaar-3. Na final di aña tabata monitor pa mira si nan a logra, y tur di e alumnonan aki a logra bula bay pa Examenklas.
Geerman ta pidi tur interesado cu kier sigui studia, pero ta pensa cu 3 aña ta demasiado hopi, pa bin purba awor cu e Fast Track Trajekt di Avond MAVO, unda lo bo keda cla den 2 aña (envez di 3 aña).
E bon na Avond MAVO ta cu tin alumno cu kier haci e Landsexamen, esta cu nan tin e guia pa yudabo y dunabo e direccion pa tuma den henter e trayecto, cu bo horarionan di les y docentenan.
Lesnan Online tambe: Aki Geerman a agrega, cu durante 2021-2022 pa prome biaha Avond MAVO tabatin full e trayecto den lesnan online, special pa studiantenan cu a haya nan cu dificultad pa bay sigui lesnan den lokaal.
E estudionan Online aki di Avond MAVO Aruba ta sigui wordo ofreci! Pero ora di haci Centrale Proefwerk, of S.E. y tambe Examen fisicamente den un klas.
Natalie Geerman a indica cu Avond MAVO e aña aki tabatin un alumno kende casi a sali e ‘Mihor Graduado’ di Aruba. E ta un dama cu tin 3 yiu, kende despues di 10 aña a dicidi na bay bek scol y a logra di gradua cu bon punctuacion. Pa djis un diferencia di 1 punto, e por a sali e Mihor Graduada di Aruba.
Esaki ta demostra cu Avond MAVO ta un trayecto cu ta un posibilidad real pa esnan cu ta bisa cu nan kier sigui studia, y ta dispuesto pa haya les di Dialuna pa Diahuebs anochi, for di 6:00 pm te cu 10:00 pm.
Tur informacion ta riba:
