No por lubida e diferencia den leynan social Aruba y Hulanda --- *Mentalidad diferente y condicionnan di bida mester haya atencion --- *Aruba cu factornan cu a subi costo medico cu por a wordo evita
ORANJESTAD (AAN) — Cuido medico na un pais ta directamente mara na e condicionnan di bida cu democracia ta exigi pa un poblacion.
Tin reglanan cu ta dicidi pa un bon maneho di Salud Publico na un pais, caminda politiconan tin e deber pa garantisa cu hende por busca su salud a base di su propio sentido di responsabilidad pero tambe a base di e infrastructura di Salud Publico.
Segun democracia tur ciudadano mester por tin e garantia di un bon cuido medico, cu no solamente ta presente na e pais, pero tambe ta pagabel na forma directo of indirecto dor di e persona.
Uno di e prome leynan cu Reino a exigi pa wordo introduci na momento cu industrianan grandi a establece na teritorio Hulandes den Caribe, tabata basa riba garantia di bon cuido medico, cu ta esencial pa bida di un ciudadano.
Bon gobernacion pues ta percura pa un nivel di cuido medico cu ta sostene e salud di e ciudadano pero tambe ta sostenibel y ta pagabel pa tur hende.
Na diferente forma Aruba a conoce seguro medico regla dor di Gobierno, cu na final a centralisa cuido medico den AZV, den cual tur hende cu ta biba na Aruba mester participa na forma obligatorio.
Un seguro medico obligatorio manera AZV ta sona bunita y ta bunita, mientras tur e componentenan di un situacion medico ideal di e pais ta presente.
Esaki ta e caso? No!
Pa Salud Publico di Aruba por gosa un situacion ideal, e mester tin e base financiero saludabel cu no ta e caso na Aruba.
Pueblo ta paga pa AZV na forma obligatorio directo, pero tambe pa medio di placa di Gobierno cu mester mantene AZV na bida pa motibo cu e gastonan di AZV y di cualkier seguro medico na Aruba, ta mucho halto.
E motibo grandi cu gastonan pa cuido medico na Aruba ta sumamente halto, no ta debi solamente na prijs di remedi y material cu mester den practica di cuido medico. E motibo grandi cu gastonan di cuido medico na Aruba ta sumamente halto, no ta debi na loke profesionalnan lo cobra compara cu otro paisnan.
E motibo grandi cu gastonan di cuido medico di Aruba ta hopi halto ta, e placa cu a wordo gasta y te awe mester wordo gasta pa loke mester pa por papia di cuido medico y den esaki nos ta pone e gastonan di hospital central.
Inversionnan cu ta wordo haci den Salud Publico, mester ta responsabel y e gastonan cu Aruba tin cu e hospital nobo no ta responsabel.
Aruba no por paga pa loke finalmente a bira prijs di e hospital, cu a manda prijs di Cuido Medico na Aruba halto hopi tempo prome cu pandemia a bati na porta.
No mester lubida cu ta AZV ta e dam financiero di cuido medico di Aruba.
Hulanda tin rason di bisa cu e gastonan di cuido medico ta halto, pero ta bira tempo pa Hulanda cuminsa splica tambe pakico e situacion cu e ta trece dilanti ta, manera e ta.
Awor pasobra decisionnan politico di pasado a percura pa gastonan di cuido medico subi na Aruba, no por pidi “eigen bijdrage” (pago for di saco di e Arubiano) sin mas.
Talbez na Hulanda por pone e formula aki den practica, ya cu Hulanda conoce cantidad di ley social cu Aruba no conoce.
Problemanan social na Aruba ta mucho mas serio cu na Hulanda, loke ta mishi cu e disponibilidad di placa di e ciudadano.
Hulanda mester tene e caracter y mentalidad di e Arubiano na consideracion. E Arubiano no ta expone su problemanan, sigur financiero, na henter mundo.
Pero cuanto Arubiano lo tin problema pa cubri un parti di nan gastonan medico den un situacion mundial cu tur prijs ta subi, tambe di remedi?
Loke si mester haci ta, tuma medida severo den tur caso cu por demostra cu abuso ta wordo haci di areglonan pa cuido medico y concientisa publico riba e balor di cada pildo, cu ta busca pero no ta uza.
Na e momentonan aki no por introduci contribucion propio pa cuido medico, cu lo tin efecto sumamente negativo y hasta por pone bida di Arubianonan cu no tin placa na peliger.
