Segun pronostico di NHC, --- * Ainda no tin advertencianan te proximo aviso
ORANJESTAD (AAN): Departamento Meteorologico di Aruba a emiti dialuna nan boletin relaciona cu e situacion general di tempo pa proximo oranan.
Un ola tropical ta pasando den region bayendo west, y lo pone temporalmente mas nubia pasa over di region local. Por spera un awacero pasahero te breve riba partinan di e isla c'un chance pa lamper cu strena.
Condicionnan maritimo / estado di lama: na partinan proteha di costa: leve, na partinan zuid: modera,
na partinan oost te noordwest di costa: modera te poco bruto
Aviso / alerta: un aviso pa boto chikito ta na vigor: ta suplica ocupantenan di boto chikito pa eherce cautela riba lama grandi y den awacero of area di lamper cu strena.
Tempo tropical significante: un ola tropical fuerte den parti central di Atlantico, a bira potencial 'Tropical Storm nr. 2'. E sistema tabata situa na 1155 km oost di Trinidad y ta move den direccion west- noordwest cu 30 km/hr.
Departamento meteorologico di Aruba lo mantene pueblo informa di desaroyonan rond di e sistema aki.
Islanan ABC ta den e trayectoria di e tormenta tropical
Mientrastanto, Caribbean Weather Channel a duna di conoce dialuna banda di 5 pm cu ya caba tin e PTC 2 (Potencial Ciclon Tropical 2) y oficialmente tin e prome advertencianan pa Trinidad & Tobago y e isla de Grenada.
E islanan ABC ta den e trayectoria di e tormenta tropical y ta spera cu e tormenta ta bay pasa pazuid di e islanan diaranson anochi cu bientonan sosteni di 50 mph (80 km/h) cu posibel rafaga di hasta 60 mph (100 km/h).
Segun pronostico di NHC (National Hurricane Center), ta spera un tormenta tropical den e islanan ABC diaranson anochi. Nan a indica cu mester emiti advertencianan pa e islanan local den e medida cu ta acerca na e periodo di e pronostico y si e cone no ta cambia.
Tin posibilidad pa 50 te cu 100 mm di yobida, y no ta descarta cu localmente por ta mas.
Mester corda cu e cambionan ta posibel y cu ainda no tin advertencianan te cu un proximo aviso, asina Caribbean Weather Channel a indica.
Di ultimo ora, DIARIO a haya sa cu Gobierno hunto cu Rampenbestrijding tabata reuni ayeranochi relaciona cu e ultimo desaroyonan tocante tempo.
Keda pendiente pa mas informacion cu lo wordo emiti di parti di Gobierno y e instancianan oficial na Aruba.
