Parlamentario Marco Berlis (MEP):
Politico a keda ausente hasta na reunion publico di Ombudsman
ORANJESTAD (AAN): Ser un parlamentario responsabel kiermen cu nos presencia na reunionnan publico ta un obligacion, y cu realmente no tin un excusa pa no ta na pia di trabao sino no ta pa enfermedad of cosnan di urgencia real. Sinembargo pueblo por a observa esnan cu mas ta critica, cuestiona y punta dede tur caminda, ta esnan cu menos ta atende trabaonan na Parlamento. Ausencia structural, yegamento laat mas cu un ora of dos ora, ta na ordo di dia pa Marisol Tromp y Miguel Mansur. Ta bisto cu ta pone prioridad riba vakantie y graba video enbes di atende cu leynan serio pa sigura e progreso di nos pais.
“Rapport” Parlamentario cu “dikke” onvoldoende pa Marisol pa aña 2022-2023
Tur aña Parlamento ta publica e “presencia y ausencia” di cada parlamentario na reunionnan publico. Adicionalmente ta keda publica cuanto pregunta cada un di nos ta haci den un aña parlamentario. Pa ambos di esakinan Marisol Tromp a score na 2023 un “dikke onvoldoende.” Dicon? Pasobra Marisol tabata tin varios ausencia, y apenas a haci 36 pregunta na minister. Esaki ta ekivalente na 3 pregunta pa luna. Kizas ora e lesa e articulo aki e lo core ripiti algun pregunta bieu di 2021-2023 por escrito na minister pa “drecha” su “rapport’?
Marisol ausente di un Reunion Publico cu e mes a exigi
Aunke tur reunion publico ta sumamente importante, ta bon pa remarca cu Marisol Tromp tin un ausencia halto pa 2023-2024. Asina Marisol a bay prensa pa “supuesto fraude” cu helicopter, acusando minister Rocco Tjon pa mal maneho y falta di transparencia. Marisol a exigi un reunion publico riba e topico, a manda un carta na Presidente di Parlamento pa trata e tema, a skirbi riba su Facebook riba e tema….sinembargo, ora e dia di e reunion publico a yega, Marisol tabata ausente! Dicon? Pasobra ora cu e la wordo informa pa minister cu un amigo abogado ta wordo menciona den e documentonan, Marisol a hala kita mesora! Asina Marisol, un politico di 27 aña ta keda hunga cu mente di pueblo.
Marisol ausente na reunion publico di Ombudsman
Recientemente tabata tin e reunion publico historico, den cual Parlamento mester a scoge entre e nombernan kende mester a bira e prome Ombudsman di Aruba. Un dia masha importante den cual publicamente a scoge e prome Ombudsman Jurima Bryson pa e posicion. Unda Marisol tabata e dia ey? Ausente atrobe!
Marisol den cushina di Parlamento pa ley di TPEF no wordo trata
Ademas, Marisol tabata presente na januari 2024, ora mester a vota den e reunion publico di TPEF (Tourist Product Enhancement Fund), cu ta wordo usa pa embeyece nos isla, pa financia proyectonan turistico y paga ploegnan pa tene nos costanan limpi. Pero kico Marisol a haci? E la bay sinta den cushina pasobra e no kier tabata presente den sala di Parlamento pa asina stroba e reunion publico di tuma lugar. Esaki ta pa locual Marisol Tromp a huramenta dilanti Gobernador?
Asina Marisol ta traha cu “eer en geweten?” Marisol su actitud iresponsabel ta keda demostra claramente cu e no ta luchando pa bienestar di nos pais, pero pa sigui nutri su imagen politico. Ta di spera cu Marisol lo haya un dikke Nul Komma Nul pa su ausencia frecuente y su prestacion inconsistente.
