Asja Dongen, PR di WEB Aruba NV:
*Plantanan mobile lo yuda maneha demanda creciente di energia
ORANJESTAD (AAN) – Relacionista Publico di WEB Aruba NV, Asja Dongen, a sigui splica den entrevista cu DIARIO cu eigenlijk no ta bateria, sino motornan den un planta temporal, loke ta wordo yama “planta mobile”, locual WEB Aruba NV lo adkiri for di e compania Bredennoord, di Hulanda.
Dongen a duna di conoce cu ta bay ship 24 container tur di 20 pia, cu generadornan di 850 kilowatts. Total e ta bay aporta WEB cu 20 mega watts.
“Esaki ta un di e medidanan riba termino cortico pa e compania por handle e demanda creciente di coriente. Manera nos sa, e temperatura ta subi, economia ta crece, pues nos ta wak un aumento basta stabil creciente den coriente”, Dongen a señala.
El a agrega cu e planta mobile aki ta bay yuda WEB pa por deal cu e demanda, di un banda, pero tambe nan motornan regular den e plantanan di recip mester di nan mantenimento regular obligatorio.
“Pues, asina cu e motornan ey bay den mantencion, e planta mobile aki, ta bay yuda toch mantene e suministro di coriente, na un nivel stabil. Tambe ora cu diripiente coriente di biento of solo bira menos, pa motibo cu no tin biento, of cu no tin solo, e ora ey tin un caida akinan den e produccion; pues, e planta temporal mester mantene e produccion stabil”, Asha Dongen a comenta.
Dongen a subraya cu semper tin chens di un 'blackou't, pues esaki no por descarta. Pero tur e medidanan aki ta limita e chens cu tin un 'blackout'.
E planta mobile ta bay keda, en principio, pa un termino di dos aña. “Aworaki, nos ta bezig cu preparacion di e tereno y e infrastructura, y si tur cos y nan a ship e container caba y si tur cos bay bon ora nan yega nos ta bay den operacion na fin di Augustus caba”, Asja Dongen a indica.
El a subraya cu WEB ta haciendo tur nan esfuerzo cu tur e preparacionnan, pa ora e temporada di calor di berdad drenta na Augustus, September, nos tin e planta mobile den operacion caba.
E planta aki ta bay wordo maneha un parti pa e expertonan di WEB y un parti pa e compania Bredennoord, pero no ta motornan di otro tipo, sino motornan conoci caba pa WEB Aruba NV, pues, WEB por maneha esaki.
