Hopi cocaina y marihuana na costa Colombiano
ORANJESTAD (AAN): Nan ta wordo vigila sea di lama of di halto. Cualkier obheto cu radar ta detecta moviendo riba Lama Caribe cu velocidad halto, mesora ta hala atencion di tur oficial hudicial den Lama Caribe.
Esey ta inclui oficialnan di Armada Nacional di Colombia, kendenan den fin di siman a logra intercepta y detene dos persona venezolano, cu tabata abordo di un speedboat tipo Go-Fast. Den nan poder a bin haya un total di 1 ton di marihuana, y mas di 70 kilo di cocaina. E accion militar aki a socede como 40 miya nautico riba lama for di e sector conoci como Playa Camarones, na Riohacha na La Guajira. Esaki ta como 380 kilometer pabao di Aruba.
A ser bisa, cu ta un avion di Fuerza Aerea Colombiana ekipa cu marine-radar, a detecta e speedboat Go-Fast aki moviendo cu velocidad halto ta bayendo panort. Nan no sa si e tabata rumbo pa islanan ABC, of ta rumbo pa Venezuela, of ta bayendo pa Republica Dominicana, of otro pais den Centro America.
Den bon coordinacion, e mensahe a bay pa Guardacosta Colombiano ubica na Santa Marta, kendenan riba lama a lansa un ‘Unidad de Reacción Rápida” (URR) cu den apenas par di minuut a logra intercepta e boto sospechoso, tripula pa dos persona. Nan a logra obliga e Go-Fast pa stop cueste loke cueste, y abordo a bin haya 39 bulto grandi, tur di nan yena cu droga.
Nan a trece tanto e speedboat Go-Fast, e dos detenidonan, y e material confisca bek pa un Pier safe na Colombia, pa asina entrega esaki na autoridad.
Test di peso a determina cu tin 74 kilo di cocaina. Marihuana tabatin 1.073 kilo di marihuana. E cargamento ilegal aki riba caya lo tin un costo di riba di 9 miyon Dollar internacionalmente.
