Academia ABG
ORANJESTAD (AAN)-- Partido RAIZ ta orguyoso di unvez mas, trece Academia di Bon Gobernacion (ABG) pa e comunidad di Aruba. Iniciando dia 2 di October te cu 4 di December 2025, ABG lo presenta un total di 10 sesion riba diferente topico, presenta pa expertonan den nos comunidad. Participacion den ABG ta pa esnan cu kier compronde kico ta encera ‘Bon Gobernacion’ sin importante color politico y sin cualkier compromiso na Partido RAIZ. Participacion ta pa personanan di 18 aña of mas y ta completamente gratis.
“Partido RAIZ ta comprometi na e proceso pa logra un politica progresivo y participativo. Pa logra esaki, ta esencial pa sigui uni forsa pa asina logra un pais unda por biba den harmonia, un pais sostenibel y uno resiliente pa medio di politica y gobernacion sano cu ta digno di confianza real”, Sr. Ursell Arends, Lider, Partido RAIZ ta comenta.
Kico ta Academia di Bon Gobernacion?
E meta principal di ABG ta pa atravez di contenido riba nivel presenta pa profesionalnan den nos comunidad, amplia e conocemento di cada ciudadano riba e tereno di nos derechonan estatal, constitucional, gobernacion y politica en general.
Cuminsando 2 di October te cu 4 di December 2025, un total di 10 sesion lo wordo presenta riba diferente topico door di expertonan den nos comunidad. Les lo wordo duna na Papiamento y Ingles. Pa participantenan ricibi un certificado di terminacion, cada participante lo mester ta presente na minimo 7 di e sesionan.
ABG ta orguyoso di por conta cu un grupo selecta di profesionalnan di nos comunidad cu a tuma e encargo pa comparti nan conocemento den lecturanan informativo y participativo. Oradornan profesional lo wordo anuncia pronto. Topiconan cu lo wordo cubri ta lo siguiente: (*) Transformacion Digital. (*) Staatsrecht. (*) Social Economic Impact. (*) Statistiek & Beleid. (*) Good Corporate Governance. (*) Relacion cu Prensa. (*) Reforma Democratico. (*) Public Healthcare Innovation & Transformation. (*) Climate Adaptation & Climate Finance.
Cada les lo tuma lugar riba diahuebs, di 7or pa 9or di anochi den edificio di ATIA na Gallegostraat 6, Dakota.
Haci uso di e oportunidad, inscirbi na e Academia di Bon Gobernacion (ABG) 2025 atravez di e website:
Asina duna bo mes e oportunidad di amplia bo conocimento riba diferente areanan relaciona cu Constitucion, Gobernacion y Politica. Participacion na e Academia di Bon Gobernacion ta completamente gratis.
