Atelier’89 cu interesante presentacion di e Performance E RUTA

ORANJESTAD (AAN) – Recientemente, a tuma lugar na Atelier’89 (E punto di Bellas Artes Foundation Aruba) a haci presentacion din e performance  “E RUTA”

y den un entrevista cu DIARIO, Elvis Lopez a elabora tocante e actividad aki.

Lopez a splica cu esaki tabata algo unico; un “performance” den cual seis studiante a participa den un tayer di trabao, bao guia di Natusha Croes, y via E RUTA por a ser conoci cu nan, y nan a presenta locual nan a siña durante un luna largo.

Elvis a expresa cu e momento unico y, hopi special, ta ora nan a tene un minuut di silencio unda cada participante a purba di reconoce su mes (revela su realidad interno), y pa e publico reconoce su mes pasobra nan tambe a participa den e “performance” aki.

FUTURO PROYECTO:

Seguidamente, Elvis Lopez a indica cu Atelier’89 su mision ta promove e arte aki na Aruba, incansablemente, no obstante e momentonan di crisis y ta purba di hiba e arte padilanti numa, apesar di kico pasa.

Atelier’89 ta e plataforma di arte na Aruba unda cu nan ta trahando riba un instalacion grandi den cual lo presenta 16 artista y e tin e nomber di PAN.

Ta trata di 16 artista cu Atelier’89 ta yuda y sostene y cu ta bay traha nan obranan akinan, pa e publico por wak. Esaki lo ta despues, den luna di Juli proximo. Mondriaan Fonds ta yuda e alumnonan di Atelier cu ta bay participa den PAN.

Ademas, Atelier ta ay lanza su website nobo den e di dos siman cu ta bin, y e ora ey nan ta bay mustra  un cara totalmente nobo y tur esaki ta parti di e concepto cu nan ta creando un Atelier nobo, pa asina henter e publico na Aruba por aprecia arte un poco mas.