ORANJESTAD (AAN): Tabata den oranan di atardi cu un habitante na Sabana Basora a bay pa benta sushi afo, y el a descubri cu tur su dos Toter di Serlimar no tey mas! Anto e tin e bakinan di sushi aki poni paden di su cura!
Con esaki por ta posible? E ciudadano semper ta paga su servicio mensual pa Serlimar, y awor e bakinan no tey. El a pensa cu kizas ta ladron a bay cu e dos Toter aki.
Sinembargo mas laat su bisiña a bin cerca dje, pa bise cu anteriormente un funcionario di Serlimar cu un Pickup a yega eynan. E funcionario a puntre encuanto e bakinan di sushi. E bisiña a bise pa warda un rato, y el a bay bati na porta di e habitante. Pero aparentemente e habitante tabata paden pero no a tende e batimento na porta.
E ora el a bin bek pafo y bisa e funcionario di Serlimar cu e no ta haya reaccion. E ora e funcionario a bise cu e habitante a cancela su abono di servicio, y pesey e ta bay cu tur dos Toter. Sin cu el a mustra un prueba di cancelacion ni nada, el a djis rek y saca e dos bakinan aki for di e cura di cas, y cu sushi aden tambe, el a djis bay cu nan.
E habitante a keda asombra, pasobra nunca e no a cancela su abono pa servicio di Serlimar. El a drenta den contacto cu Serlimar, y nan tambe a keda asombra cu a bay confisca e dos bakinan aki, siendo cu e cliente ta pagando bon y hamas a cancela esaki.
Resultado di esaki ta cu un otro persona sin ningun uniform bisti, despues a yega cu un otro pickup y a djis baha y pone dos Toter eynan pa e habitante y a sigui core.
Loke e habitante kier a remarca riba dje, ta cu ta increible pa pensa cu un persona por bin confisca bo bakinan di sushi, sin cu e ta sikiera mustra e habitante (of e bisiña) un prueba cu enberdad e persona a cancela of no. Kizas e funcionario a bay na adres robez, of kizas ta hende pa joke ta yama Serlimar y cancela servicio di cualkier persona riba e isla.
E ta kere cu di awor en adelante ora cu Serlimar bay confisca bakinan di sushi na cas di ciudadanonan, nan tin di presenta cu por lo menos un formulario como prueba cu enberdad e persona a cancela of no.
