Atardi di recorido pa recauda fondonan pa salud di JRod

ORANJESTAD(AAN): Diasabra atardi, gran parti di e bikernan di Aruba, especialmente esnan den e Mundo di Harley Davidson,

a organisa un atardi di recorido, pa asina recauda fondonan pa nan amigo Jairo, tambe conoci como J Rod.

Jairo a sufri un accidente y ta trahando duro riba su recuperacion, pero e tratamento y terapianan ta basta costoso. Pa e motibo aki, e bikernan a mustra hermandad cu tin entre e bikernan di Aruba y a organisa un atardi pa recauda fondo, pa asina alivia e gastonan pa Jairo.

Un grupo di 68 biker di diferente Estado di Merca tambe a participa den e bunita gesto aki. E recorido a cuminsa y termina na Old School arena y esnan cu a participa a pasa un atardi hopi agradabel y a haya chens di gana diferente premio.

DIARIO ta manda palabra di pabien na tur e bikernan cu a colabora cu e bunita gesto aki y un palabra di pronto recuperacion pa Jairo.