Despues di 16 aña e prijs ta cambia
ORANJESTAD (AAN): Aki dos siman, esta riba 15 di november 2022 e prijs di cilinder di gas cu mayoria hende na Aruba ta usa pa conecta nan stoof, nan water heater, y dryer, etc., lo wordo ahusta. Ta trata aki di e boter di gas di 100 lbs. pa uso domestico.
Aworaki bo ta pagando 46,38 Florin pa un boter di gas. Pero entrante Diamars 15 di November 2022, esaki lo bay bira 60,00 Florin.
“E prijs pa cada cilinder di 100 lbs. lo ta 60,00 Florin te cu un proximo aviso,” ta loke Arugas a indica oficialmente.
Pa prome biaha den 16 aña cu e prijs di gas ta cambiando na Aruba!
Cantidad di boter awor a bira 4 cilinder pa aña: Segun Arugas, nan lo revisa e prijs di gas domestico na comienzo di cada cuartaal. Entrante prome di januari, 2023 e prijs domestico lo ta aplicable riba e prome 4 cylinder cu un cliente domestico cumpra den un aña. Pa e di 5 cilinder en adelante, e cliente domestico ta paga e prijs normal cu ta vigente na momento di compra di e cilinder.
E prijs di LPG (gas pa cushina) ariba mercado mundial a conoce un subida continuo den e ultimo añanan y esaki no a keda refleha den e prijs pa un cilinder di 100 lbs. pa uso domestico. E prijs actual di 46,38 Florin pa un cilinder di gas domestico ta bou di e prijs di importacion.
Cu e cambio den prijs Arugas ta sigui traha pa garantisa pueblo di Aruba un producto di bon calidad na un prijs cu ta refleha e mercado mundial actual.
