Aruba y Curaçao a firma un MoU pa traha hunto riba tereno economico

ORANJESTAD (AAN): Diaranzon mainta na e establecimento recien renoba di ‘Pepe Margo’ situa den e cas tipico di antes famia Wever den Wilhelminastraat,

Minister Geoffrey Wever hunto cu Minister Ruisandro Cijntje di Curaçao a firma un “Memory of Understanding” cu tin como punto di salida como islanan bisiña, ruman, traha hunto pa logra resultadonan cu beneficio mutuo pa ambos Aruba y Curaçao nan economia, comunidad, y ciudadanonan.

   Na opinion di Aruba, e isla ruman Curaçao ta un partner importante den desaroyo economico di Aruba. Cu un historia politico cu raiznan fuerte riba diferente area, familiar, social y economico, semper e lazo entre Aruba y Curaçao tabata uno fuerte. Pesey ta importante fortifica e cooperacion entre ambos pais.

   Aruba como economia chikito y habri ta importa mayoria di su productonan.

Den 2022 Aruba a importa na un balor di 31 Miyon Florin for di nos hermana isla Curaçao. Den e mesun periodo Aruba a exporta un balor di 10.8 miyon Florin pa Curaçao.

  Cooperacion entre partners, entre paisnan ta un instrumento esencial den maneho economico di minister Geoffrey Wever. Cooperacion ta brinda ambos pais e oportunidad pa por traha y logra mas hunto riba tereno economico.

  E firmamento di e “Memory of Understanding” entre Aruba y Curaçao, ta un prome stap concreto y ta accentua e importancia di cooperacion economico pa nos logra resultadonan concreto pa nos consumidornan y nos comerciantenan.

   DIARIO a compronde cu Aruba y Curaçao lo traha hunto riba: (*) Tereno di comercio y inversion, y entre otro firma e acuerdo bilateral pa stimula comercio liber entre nos paisnan.  (*) Lo explora oportunidadnan pa logra mas comercio y mas inversion.

   Tambe lo sigui riba: (*) Lo promove desaroyo sostenibel den ambos pais. (*) Lo coopera riba tereno di competencia y proteccion di consumidor. Ambos Free Trade Authority di Aruba y tambe di Curaçao lo tin un rol importante den esaki.

   E acuerdo ta duna nos como mandatario e oportunidad y responsabilidad di duna contenido concreto na nos rol pa facilita comercio pa e por florece,

di duna consumidornan mas escogencia den producto, facilita competencia husto cu e solo meta di stimula mas comercio, y pa atrae mas inversion, segun Minister Geoffrey Wever.

   Na e acto di firmamento tabata presente tambe Prome Ministro Evelyn Wever-Croes kende a dirigi algun palabra tambe di e importancia di e cooperacion entre e dos paisnan ruman.