ORANJESTAD(AAN)—Kico ta pasa ora un mucha ta wordo entrega na un persona of organisacion, cu ta haya di mayornan tur oportunidad pa haci y deshaci cu un mucha manera nan kier?
Esaki tabata e motibo di un investigacion cu DIARIO a inicia algun siman pasa ora Gilbert Webb, cu a funda Aruba Bootcamp Foundation na edad di 18 aña, seis aña despues cu el a bira noticia controversial na Aruba, a presenta como candidato pa Parlamento di Aruba cu segun informacion aspiracion pa bira Prome Ministro di Aruba.
For di momento cu el a presenta su mes den pantaya cu un partido politico, DIARIO a wordo adverti. Ora otro partido a yuda pa e haya suficiente firma pa participa na eleccion, DIARIO a cuminsa presenta resultadonan di investigacion special riba e peligernan cu e proyectonan di Gilbert Webb tabata representa pa Aruba.
DIARIO a cuestiona cu den e Estado di Derecho di Aruba, Gilbert Webb por a haya oportunidad sin sosten di ningun areglo oficial di loke un internaat mester ta, pa bay cuido muchanan cu segun portretnan y video cu DIARIO a mira, tabata un horor pa e muchanan cu tabata preso den e campamentonan di Gilbert Webb, cu hasta a crea un school den su organisacion despues cu tur instancia oficial pa proteha mucha a lanta contra Boot Camp y a haya razon di Huez.
DIARIO a bini cu relatonan cu ta proba con den exterior mas y mas investigacionnan ta wordo haci riba e tipo di internaatnan aki, sigur si tuma nota di Gilbert Webb mes, cu a crea un tipo di ehercito militar di cual e ta Hoofd Commandant uniforma.
Ayera informantenan di DIARIO a bolbe bati alarma despues cu CNN a emiti un informacion tocante un “residential school” (internaat) na Canada, caminda 215 mucha sigur a perde nan bida sin cu esaki a bira conoci.
Arubianonan a bati alarma grandi y a pidi DIARIO pa cu urgencia pidi tur instancia envolvi den asunto di mucha pa start un investigacion profundo riba e legalidad y e base di Aruba Bootcamp y e autoridad cu Gilbert Webb por tin pa tin mucha di “diez pa 22 aña di edad” preso den su campamento.
A wordo mustra cu mester papia di preso, pasobra e muchanan no por haci loke nan kier y no por bandona e institucion riba nan mes. Atrobe a wordo mustra cu mester investiga e mayornan cu ta pone nan yiunan disponibel na e campamento di Gilbert Webb y igualmente publica abiertamente tur persona y instancia cu ta traha cu Gilbert Webb, mescos cu e origen di e placa cu e tin pa e Bootcamp pa cual e ta Hoofd Commandant.
Relatonan sumamente tristo mundo a cuminsa comparti ayera atrobe, ora alumnonan bieu di e school na Canada, caminda 215 mucha misteriosamente a muri sin cu hende tabata sa, a cuminsa presenta nan relato.
Tabata trata di muchanan Indjan cu no tabata tin mayornan pa defende nan causa y a topa cu nan morto, manera informantenan a trece dilanti.
Na Aruba ta dificil pa mucha muri debi na e comunidad chikito, pero si mucha por wordo mentalmente destrui y pa medio di supuesto castigo, fisicamente tortura den e campamentonan manera di Gilbert Webb, cu Huez mes a bisa instancianan oficial tabata tin motibo pa cera.
Si e caso di Aruba bira noticia internacional, por spera accion di gruponan cu mas y mas ta bini dilanti pa muchanan cu ta bira victima di organisacionnan cu un Estado di Derecho no por permiti.
DIARIO ta sigui informa.
