ORANJESTAD (AAN): Recientemente durante e anochi di huramentacion di e directiva 2021-20202 di Aruba One Happy Island Lions Club un reconocimento special a wordo entrega door di Presidente saliente 2020-2021
Fellow Lion Junior Arends na Fundacion Pa Nos Comunidad (FPNC). Invitadonan special di e anochi aki tabata Señorita Jadey Mau Asam y Señor Liandro Loopstok di Fundacion Pa Nos Comunidad.
Na momento cu Aruba a wordo afecta pa e pandemia, e situacion a bira hopi dificil, un cantidad grandi di famia a perde trabao of a bay atras den entrada cu consequencia cu hopi famia no tabata tin e forsa financiero pa cumpra cuminda. Fundacion Pa Nos Comunidad a asumi un rol di vital importancia desde comienzo di e pandemia caminda a sa di yuda miles di persona den necesidad na e momento cu mas nan tabata tin mester di esaki. Mester remarca cu esaki a exigi un organisacion total, cu a tuma hopi trabao, dedicacion y tempo a pa atende esaki.
Como muestra di aprecio y gratitud pa nan balioso servicio, cooperacion y apoyo brinda, den nomber di Aruba One Happy Island Lions Club a ser entrega un Certificado di Aprecio na Fundacion Pa Nos Comunidad.
Ademas a duna un reconocemento special na Sr. Liandro Loopstok di Fundacion Pa Nos Comunidad pa su trabaonan incansabel yen di dedicacion pa comunidad di Aruba. Como muestra di aprecio Sr Loopstok a ricibi for di Presidente saliente Lion Junior Arends “ The International Association of Lions Clubs Medal of Merit” . Esaki ta un distincion special pa un persona den comunidad cu a destaca grandemente door di duna servicio na comunidad y a sobresali den actonan humanitario.
Aruba One Happy Island Lions Club kier a felicita y gradici Fundacion Pa Nos Comunidad, Senorita Jadey Mau Asam y señor Liandro Loopstok. Igualmente nos palabranan di danki special na Sra. Gianaika van der Biezen, directora di FPNC cu pa motibo di otro compromiso no por tabata presente e anochi aki.
Aruba One Happy Island Lions Club ta orguyoso di por ta un partner den servicio cu FPNC pa comunidad di Aruba.
{gallery}Aruba One Happy Island Lions Club Fundacion Pa Nos Comunidad{/gallery}
