ORANJESTAD: E cantidad di adulto entre 30 y 79 aña di edad cu presion halto di sanger, a subi for di 650 miyon pa 1.280 miyon den ultimo 30 añanan.
E datonan ta forma parti di e prome analisis mundial grandi di e tendencianan di e malesa, e deteccion y tratamento pa cu control di hipertension, dirigi pa Imperial College na Londres, y e World Health Organization y publica 7 dia pasa den e revista medico britanico The Lancet.
Casi mitar di e personanan aki no sa cu nan tin presion halto di sanger, segun WHO a adverti via un boletin.
Pakico un alerta mundial: Manera semper e organizacion internacional a bin ta informa, ademas cu e ta un di e principal causa di morto y malesa rond mundo, hipertension ta aumenta considerablemente e riesgo di haya mas malesa cardiaco, cerebral, y di riñon.
Sinembargo segun WHO a splica, e por wordo detecta facilmente djis door di midi bo presion di sanger sea na cas, of na centrro di salud, y hopi biaha bo e por wordo trata eficazmente cu remedinan di costo abao.
Encuanto e estudio: Esaki a wordo haci pa un red mundial di docter y investigador, y a cubri e periodo di 1990 – 2019. Nan a usa datonan di midimento y tratamento di presion di sanger di mas di 100 miyon persona di entre 30 y 79 aña di 184 pais, cu hunto a cubri como 99% di poblacion mundial.
Aki WHO a splica, cu e estudio aki asina a bira e revision mas completo di tendencianan mundial di presion halto di sanger te cu awor.
“Door di analiza e cantidad enorme di dato, e investigadornan a descubri cu tabatin masha poco cambio den e tasa general di presion halto di sanger na mundo desde 1990 pa 2019, pero e carga a move for di e paisnan rico, pa e paisnan cu tin entrada abao y mediano.”
A determina cu e tasa di hipertension a disminui na e paisnan rico, cu awor tin por lo general algun di e tasanan mas abao, pero el a subi bay halto na hopi pais di entrada abao y mediano.
“Como resultado di esey, Canada cu Peru y Suiza tabatin menos caso di hende cu tin hipertension na nivel mundial na 2019, mientras cu algun di e tasanan mas halto a wordo observa na Republica Dominicana, Jamaica, y Paraguay pa e muhernan, y na Hungria, Paraguay y Polonia pa e hombernan”.
Republica Dominicana ta ocupa e di cuatro lugar (49%) entre e 10 paisnan cu mayor prevalencia di hipertension na 2019 pa muhernan.
E documento di WHO ta mustra cu aunke e porcentahe di personanan cu hipertension a cambia poco desde 1990, e cantidad di hende cu presion halto di sanger a duplica y a yega na 1.280 miyon persona.
Y ta mustra cu esaki a bin principalmente debi na e crecimento di poblacion y enbehecimento. Na 2019, mas di mil miyon di hende cu hipertension (como 82% di tur hende cu hipertension na mundo (tabata biba na paisnan di entrada abao y mediano.
Sin haya tratamento: Aunke ta hopi facil pa diagnostica presion halto di sanger y relativamente facil pa trata esaki cu remedi di costo abao, e estudio a revela cu tin un bashi enorme den e diagnostico y tratamento. Como 580 miyon hende cu hipertension (como 4% di muhernan, y 51% di hombernan) no sa mes cu nan tin presion halto, pasobra nunca nan a wordo diagnostica,” segun WHO ta indica.
E estudio a indica tambe cu mas di mitar di e personanan (53% di muhernan y 62% di hombernan) cu hipertension, esta un total di 720 miyon persona, no ta ricibiendo e tratamento cu nan tin mester di dje.
E datonan aki a wordo tuma di 1.201 estudio cu 104 miyon participante di 184 pais di entre 30 y 79 aña di edad, cu tin presion halto di sanger, y tambe cu dato riba nan tratamento.
