Na final di uno di e añanan mas dificil den historia di e pais
- Cantidad halto di Arubiano ta pone Florin lora na final di 2022
- Tradicionnan ta bolbe pa uni Arubiano den saludo na futuro
ORANJESTAD(AAN)- Trafico den Caya Grandi! Aruba ta topa Aruba atrobe pa yega na final di un 2022, cu a bira uno di e añanan mas dificil cu Aruba a conoce pa yega na uno mas dificil, cu lo ta 2023.
Pa nos e hecho cu Caya Grandi, cu nunca mester a wordo cera pa trafico manera semper nos a sostene, ta habri atrobe pa trafico, ta bisa mucho mas cu solamente e hecho cu auto por pasa caminda normalmente ta destina pa tram.
Aruba ta bolbe na su esencia na su sentido di union, di comparti bon y malo pa hunto permiti e pais sigui dilanti pa un futuro nobo.
Aruba a cende luz den un Caya Grandi cu ta diferente na e caya principal, cu a wordo cera un dia pa trafico loke sin duda a afecta comercio den e centro di Oranjestad cu tabata lugar pa prome cu anochi cera, trafico move menos rapido pa tur hende por saluda otro y pa e negoshinan a keda bibo.
Awe cu Aruba ta topa, Arubianonan ta bini hunto pa celebra fin di 2022, cu ta haci cu tur hende mester yuda Florin lora.
Manera nos por a comprende di e cantidad di hende cu ta duna nan comentario, na 2022 Florin lo lora manera Arubianonan ta capaz pa laga nan Moneda lora, pa medio di cantidad di negoshi cu famianan Arubano a introduci pa por haya un entrada extra pa nan por sigui dilanti.
Awe “pisca” ta forma uno di e articulonan principal di DIARIO pa asina honra e plato tradicional di Aruba den temporada di fiesta, cu ta “pisca tempera” cu e sabor scondi, cu Arubiano so por produci.
Pero ta Arubiano so por produci e sabor di tur e delicianan cu ta bandona cushina pa bay wordo presenta na e publico di Aruba cu atrobe por reuni pa celebracionnan manera ta tradicion.
Awe Aruba mester sostene Aruba. Awe mester keda Aruba pa cu gratitud, celebra e cambio di 2022 pa 2023 y pone Florin lora pa tur establecimento Arubano, grandi y chikito.
Awe e Arubiano mester keda cas pa aki cumpra e cantidad di adornonan exclusivo y unico cu Arubianonan a traha na man, pa nan por tin un entrada extra.
Negoshinan tin nan porta habri pa tambe participa na un fin di 2022, cu ta habri porta pa un 2023, den cual Aruba ta dicidi pa Aruba.
Pasobra facil 2023 lo no ta pa henter mundo. Loke ta haci 2023 mas facil pa Aruba ta, cu Aruba ta sostene Aruba y cu Aruba ta un famia grandi cu Dios a permiti bolbe uni den su Caya Grandi na Oranjestad, pero tambe den tur su barionan y tur localidad caminda e famia Arubano como un solo Pueblo lo enfrenta futuro.
Awe Aruba mester cende e luz pa futuro di Aruba, cu lo sobrebibi retonan cu ta spera pa un dia cu orguyo entrega na muchanan di awe, e Aruba cu a conoce temponan di tribulacion grandi pero awe ta baña den luz pa drenta un futuro di bendicion!
Habri caya, habri alegria, habri futuro pa Aruba!
