A reuni cu Centraal Plan Bureau Hulanda pa mira con Aruba por haci mihor proyeccion y calculacion economico

Premier Evelyn Wever - Croes:

ORANJESTAD (AAN):  Manera ta conoci, Prome Minister Evelyn Wever - Croes ta actualmente na Hulanda pa atende diferente reunion den cuadro di Aruba su situacion financiero. Un di e reunionnan cu tabatin tabata cu Centraal Planbureau (CPB) cual ta e instancia na Hulanda cu ta haci calculacionnan estadistico y proyeccionnan pa e gobierno Hulandes. 

            Prome Minister Wever - Croes a splica cu Aruba ta den proceso pa mehora su calculacionnan y proyeccionnan economico. Den cuadro di esaki a reuni cu CPB pa mira con por mehora esaki pa evita cu ta haya hopi discusion ora trata introduccion di cambionan manera cambio di belasting y efecto financiero, cual tabata un punto di discusion cu CFT. Ademas, Proem Minister a indica cu mirando cu pa otro aña ta cumpli cu e normanan principal, ta purbando di soluciona otro asuntonan pendiente. Expertonan di Directie Financien a splica con nan ta haci proyeccionnan especialmente pa termino largo, y nan a indica cu nan ta haci mescos akinan.

            Finalmente Premier Wever - Croes a bisa cu e reunion a bay bon. CPB a indica cu Aruba ta riba un bon caminda y cu nan lo yuda Aruba unda cu por. Considerando cu Aruba ta saliendo for di efecto di e pandemia, esaki lo yuda pa nos tin finansa publico sostenibel y duradero den futuro, Prome Minister a termina bisando.