AHATA Excellence Awards 2022 lo reconoce empleadonan excepcional

ORANJESTAD (AAN):  Marcando e di cinco aniversario di e programa di premiacion, Aruba Hotel & Tourism Association (AHATA) ta hopi entusiasma pa anuncia cu e evento special di AHATA Excellence Awards lo tuma lugar diasabra venidero.

            147 diferente tipo di compania ta pertenece n’e miembresia di AHATA y cada un a haya e oportunidad pa nomina e empleado mas excepcional pa e reconocemento special aki. Cada honrado ta personifica esfuerso extraordinario y servicio excelente cu ta contribui significante na un industria di turismo exitoso y economia productivo.

            E honradonan lo ricibi un certificado special y un regalo monetario cortesia di AHATA durante un cena celebratorio den e Ballroom di Hyatt Regency.

            Despues di e anochi celebratorio aki, lo anuncia cada honrado riba rednan social, ademas lo comparti un entrevista cortico graba durante e evento di cada honrado expresando nan motivacion pa logra excelencia den nan trabao diario.