Aruba Marriott Resort buscando riba 115 trahado

ORANJESTAD (AAN):  “Nos grado di ocupacion ta aumentando lihe, pero nos mester mas asociado pa por yuda nos sigui brinda e mesun nivel halto di servicio di semper”,

asina Ruthline Tromp-Theysen, Complex Director of Human Resources na Aruba Marriott Resort & Stellaris Casino, a anuncia.

E compleho di hotel, cu ta e dunado di trabou mas grandi di Aruba den sector di horeca, ta den necesidad di crece den cantidad di empleadonan.

            Mirando cu turismo ta mehorando tur siman y cu e grado di ocupacion na e compleho di hotelnan Marriott na Aruba ta creciendo, cu awor mas cu nunca nan ta den necesidad di mas asociado. Tin mas di 115 posicion habri, pa cual ta reclutando coleganan nobo pa traha den e hotelnan.

            Aruba Marriott Resort & Stellaris Casino ta e dunado di trabou mas grandi den turismo, cu no menos di 1200 empleado den servicio directo di e compania. Di henter nan personal, e hotel ta firma pa solamente 20 trahado cu permiso, mayoria den posicion ehecutivo y pa funcionnan specialisa cu no ta haya facil localmente. Esey ta encera 1,8% di henter nan staff cu ta stranhero.

            Pero, di tur e posicionnan, como mita di nan, esta 60 posicion, ta den area di housekeeping. Y ta precisamente ey e compleho di hotelnan Marriott y otronan tambe, tin un reto pa por haya trahado. Un intento pa purba yega na trahado cu ayudo di e departamento DPL di gobierno no a logra produci e cantidad desea. Di tur esunnan cu a aplica via DPL, solamente un tabata interesa den un trabou como housekeeper.

            Ruthline Tromp-Theysen a splica cu tin un percepcion robes pa e trabou specifico ey. E director di recursonan humano di e hotel a enfatisa cu e trahadonan den e departamento di housekeeping tin un bon salario, en todo caso riba salario minimo. Como cu e trabou no ta facil, nan tin dos dia liber pa siman. Nan ta haya un sin fin di incentivonan pa cumplimento y ora surpasa expectativa di trabou. “E chens pa haya un trabou den housekeeping cerca nos ta grandi, pasobra nos tin echt hopi vacatura disponibel”.

            Ruthline Tromp-Theysen a sigura cu ta intencion di Aruba Marriott Resort & Stellaris Casino pa recluta mas empleado local cu ta posibel. “Mi mes ta un Rubiano y mi tin 8 aña den funcion di director di recurso humano. Ta logico cu nos preferencia ta pa por emplea local. Pesey mi ta invita tur cu no tin un trabou of cu kier cambia pa un trabou cu mas beneficio y oportunidad pa crece y forma un carera, pa aplica awe mes, asina el a termina bisando.