NEW YORK: Un estudio nobo cu a caba di wordo publica Diahuebs pasa, a mustra un descubrimento cu por splica di con hopi pashent cu a wordo contagia cu Coronavirus durante e pandemia,
diripiente no por corda cierto palabra pa describi cierto obheto of movimento. Esnan cu a recupera di Covid-19, sinembargo ta keda cu fayo di memoria na forma inexplicable. Tin varios investigacion haci riba e topico aki, pero uno nobo cu a wordo haci bao auspicio di Columbia University na New York ta trece un bista y comprondemento nobo!
Esey ta cu e cerebro di pashentnan kendenan a fayece debi na infeccion di Covid-19, a sufri mesun cambionan molecular cu ta wordo haya den cerebro di hendenan cu e malesa di Alzheimer. E descubrimentonan aki por splica pakico algun hende cu ta sufriendo pa termino largo di Covid, ta raportando cu nan tin problema cu memoria.
E ta mustrabo cu bo no por subestima e daño di termino largo di Coronavirus. Ora cu e virus a bandona e curpa, e pashent ta bira bon bek, pero nunca mes bon prome cu el a wordo contagia.
Loke ta conoci ta cu pashentnan cu ta sufri pisa di Covid-19 ta haya fayo multi-sistema di organo cu ta envolvi no djis e pulmon, pero tambe e curazon, neural, y otro sistema. Fayonan complica di e sistema di organo ta complica e cuido cu e pashentnan di Covid-19 tin di ricibi, y keto bay ta keda mustra pakico e pandemia ainda ta causando morto.
Covid-19 severo principalmente ta presenta su mes como sindrome di respiracion induci pa pneumonia. Fayonan di hala rosea ta bin di inflamacion severo den pulmon, cu ta presenta ora cu Covid ta contagia celnan di pulmon. Problemanan cardiaco ta bin debi na multiple factor. Pa colmo, pashentnan cu malesa cronico cardiovascular, incluyendo presion halto, diabetes, malesanan pulmonar, y fayo di curazon, ta mas riesgoso pa mortalidad halto di Coronavirus.
Ademas di problema di curazon y pulmon, a ser raporta cu como 1/3 di pashentnan cu Covid-19 ta desaroya sintomanan neurologico, incluyendo dolor di cabez, halucinacion, y sentimento cu parti di bo pia y brazanan ta hinca of kima, of ta parce cu tin algo ta canando riba bo cuero.
Pero a raporta stroke, degeneracion neuronal, hinchamento di cerebro a wordo raporta tambe. Un estudio recien a mustra cu mas di 80% di cerebro di pashentnan tin inflamacion neural. Un otro sintoma frequente di Covid-19 ta e perdida di haya holor y sabor. Lo mas interesante ta cu perdida di holor y sabor ta algo cu a wordo raporta di esnan cu ta cuminza haya malesa di Alzheimer.
E estudio nobo divulga Diahuebs, a mustra cu nan ta haya prueba cu ta liga e infeccion di Covid-19 di ta activa e asina yama ‘Transforming Growth Factor-ß” conoci como TGF-ß, y e sobrecargo oxidativo. A demostra tambe cu e vianan neuropatologico cu ta causa e hiperfosforilacion di tau, cu tipicamente ta asocia cu Alzheimer, ta wordo activa tambe den pashentnan di Covid-19.
Aki tin di mustra cu e Receptor Ryanodine (RyR2) den cerebro di pashentnan di Covid-19 a demostra un fenotipo cu ta ‘leak’, cu por trece problemanan cognitivo y di comportamento.
Pues infeccion di Coronavirus ta asocia cu stress adrenergico y oxidativo y e activacion di señal TGF-ß den cerebro di pashentnan cu a sucumbi di Covid-19. Un consecuencia di e estdo hiperadrenergico y oxidativo aki ta e desaroyo di patologia tau cu normalmente ta asocia cu Alzheimer. E cambionan molecular aki cu a wordo detecta ta mustra cu tanto e cortex y cerebellum di pashentnan di Covid-19 tin un expresion reduci di Ca2+ buffering protein calbindin. Reduccion di calbindin por pone e fibranan aki bira mas vulnerable na sobrecargo di cytosolic Ca2+.
No obstante tur esaki, keto bay tin hopi pregunta sin contesta. Esnan cu kier lesa e estudio por haci esaki na: doi.org/10.1002/alz.12558
