Aruba lo ta participando na Festival di Arte Fuze na Bahamas

ORANJESTAD (AAN): Ateliers ’89 Punto Di Beyas Arte Aruba ta orguyoso di anuncia cu pa di dos aña consecutivo el

a haya un invitacion pa participa na e feria di arte Caribense ‘FUZE’ cu ta tuma luga desde dia 21 te cu dia 25 di october 2026 na Bahamas.

   E evento aki ta e unico actualmente den area di caribe cu ta uni e artistanan den e region riba un plataforma di nivel halto y duna nan e oportunidad di expone nan Arte Caribense.

   Di parti di Ateliers ’89 Punto Di Beyas Arte Aruba, dos artista, esta Nuris Lampe y Suzanne van Spall lo presenta nan obranan contemporaneo na FUZE.

   Dentro di e tema di FUZE, esta ‘Coming home’, Nuris Lampe ta expone 6 di su obranan riba canvas Nuris a haya su inspiracion for di e idea di rais y takinan bieu cu ta trece bo cas buscando comodidad entre loke ta conoci y loke e futuro ta bay ta. E ta sculptura su trabao cu pinsel chikito pasando delicadamente riba e canvas logrando perspectiva y sentimento profundo den dimension.

  Suzanne van Spall a haya su inspiracion for di e palo local, e palo di Kwihi. P’e e Kwihi ta simbolisa no solamente e tera firme riba cual nos ta biba, pero tambe e conexion cu nos antecesornan. Suzanne van Spall ta bay presenta un instalacion cu mascarada di bonchi di Kwihi. E bonchi a wordo traha un pa un, cu diferente material artificial. Tambe e lo uza cuadranan chikito cu imagen di bonchi cu a keda traha cu acrylic y potlood.

   Ateliers ’89 Punto Di Beyas Arte Aruba ta gradici Het Cultuurfonds Caribisch Gebied (CCG) enormemente pa na ayudo, sin cual participacion, Ateliers ’89 Punto di Beyas Arte Aruba na e feria FUZE aki, lo no ta posibel. FUZE ta un evento sumamente reconoci y importante den e mundo di arte dentro di nos region Caribense. Pa Ateliers ’89 Punto di Beyas Arte Aruba ta un honor pa su artistanan expone nan na dicho feria aki.