Arthur Giel, Presidente di Centro Pesca Hadicurari:
- Tin speranza di haya acceso na costa panort
ORANJESTAD (AAN)- Arthur Giel, Presidente di Centro di Pesca Hadicurari, a duna di conoce den entrevista cu DIARIO, cu Minister, a priminti acceso di e costa panort, pa Piscadornan.
“Manera e Minister a priminti, nos a wordo yama y e mesun grupo di personanan cu a entrega e carta reclamo, nos a bay hunto. Nos a wordo bon atendi, mi no por nenga esey, anto e idea ta pa nan habri e acceso bek”, Arthur Giel a menciona.
Giel a agrega cu sinta na mesa nan por a compronde tambe no ta e parti di Faro te Capel nan kier cera, den cinco fase nan kier cer’e full.
“E prome fase ta abarca di coast pa Alto Vista, despues ta bay un poco mas leu anto ta yega te Natural Bridge y despues ta sigui na e otro banda”, señor Giel a indica. Giel a splica cu tambe nan a bay cu e Ley Internacional cu mester tene na dje.
“E Ley ta duna piscadornan derecho, como ancestro of indigenanan di e Isla, pa yega na costa. Nan a bisa cu nan ta mire den e direccion ey tambe y no ta mira un problema pa duna e piscadornan acceso pa e piscamento. Nos a bay cu un par di piscado. Tin un poco piscado cu pa añanan ta haci nan pesca na costa nort, ami ta pisca na Hadicurari parti pabao, y mas tanto den dia, pero nan ta pisca anochi pa marduga grandi. 3’or di mainta nan ta pisca, anto nos a puntra pa acceso pa 24 ora”, Arthur Giel a informa.
Giel a agrega cu Minister a priminti cu nan ta topa un bez mas, prome cu e fecha cu nan mester bay Corte, pa mustra kico nan a yega na dje. “Kiermen, nos ta bezig ta wardando e yamada bek pa nos haya bay”, Arthur Giel, Presidente Centro di Pesca Hadicurari, a duna di conoce.
