Aruba Lions Club cu pakete di Pasco pa muchanan

ORANJESTAD (AAN): Den ultimo luna di aña Aruba Lions Club ta sigui yuda den comunidad cu su proyectonan entre otro cu e "Smile Mobile" cu a pasa na cas di cuido pa nos grandinan y haci limpiesa di e dentadura nan of tambe drecha si ta necesario.

Esaki sigur ta un bunita gesto pa prepara e grandinan tambe pa drenta e temporada di fin di aña cu un bunita sonrisa y sigur ta contribui na e calidad di salud.

   Mescos tambe Aruba Lions Club su hobennan di Aruba LEO Club a haci nan proyecto cu cena pa e muchanan den necesidad y despues tambe a ricibi un pakete cu cuminda y un regalito di Pasco.

  Ultimo proyecto pa 2023 di Aruba Lions Club e biaha aki a concentra riba muchanan menos afortuna cu a hiba un pakete di cuminda y tambe un regalito pa por celebra nan Pasco feliz.

   Un gran cantidad di muchanan rond riba nos isla a haya bishita di e miembronan di Aruba Lions Club cu a entrega esakinan personalmente na e muchanan y deseandonan tur cos bon y sperando cu e gesto aki nan por pasa un dushi temporada di fin di aña.

   Pa mas cu 75 aña Aruba Lions Club ta contribui na su comunidad y ta sigui cu e tradicionnan pa sigui cu e trabao dificil aki pa buska e fondonan den comunidad pa sigui yuda esnan den necesidad.

   Aruba Lions Club cu esaki kier a gradici tur comerciante cu semper a sa di yuda den e proyectonan, su colaboradornan, tur den nos comunidad cu semper ta sostene e proyectonan, pa nan aporte asina valioso pa por duna back na comunidad.

   Alavez kier a desea tur hende, pueblo en general pa por celebra e fin di aña den harmonia cu bisiña, famia y conocirnan y pa esnan pa cualkier motibo ta den tristeza of pa motibo di malesa no por celebra, ta desea nan tambe hopi forza y positivismo pa e 2024 por tin prosperidad, salud y felicidad.