ORANJESTAD (AAN): Asociacion di Cuminda & Bebida di Aruba (AFBA) ta anuncia cu nan ta apunta Miriam Dabian den nan team di liderazgo como Oficial di Operacion nobo.
Miriam ta bin c'un caminda di experencia y un historial sobresaliente, tin casi cuater decada dedica na Oficina di Turismo di Aruba (A.T.A.) y varios posicion den sector di turismo.
Miriam a cuminsa su carera riba Dia Internacional di Muhe, 8 di maart 1983, na A.T.A., unda cu e tabatin diferente posicion y a lidera hopi proyecto impactante.
Den un comunicado reciente titula 'Cerando Circulo,' Miriam a refleha riba su retiro, enfatisando e importancia di gratitud y reflexion personal mientrastanto ta despedi di un capitulo satisfactorio cu a dura casi 40 aña.
Na Colombia, Miriam a studia Hotel & Tourism Management y despues di completa su estudio na 1982, a uni na A.T.A. na Colombia. Su dedicacion a hiba pa e posicion di direccion na Colombia despues di cuater aña. Despues, el a muda pa Aruba, sirbiendo pa mas cu un decada y establece oficina di Eventonan Special. Su perspectiva global a amplia durante su periodo di cinco aña como Director di Mercadeo na A.T.A. mundialmente.
` Na Caracas, unda el a maneha Latinoamerica y Venezuela pa dies aña, a duna un toke creativo na diferente proyecto. Cu un pasion pa uni Latinoamerica, Miriam a logra simplifica operacionnan di A.T.A., consolidando strategianan y mensahenan bou di un sede regional.
Awor cu Miriam a retira, su caminda a crusa cu AFBA, unda el a asumi e rol di Chief Operating Officer.
Miriam ta mira AFBA como un guia di balor pa su miembronan, bogando pa nan interesnan y inspirando e siguiente generacion di profesionalnan.
Su vision global ta inclui posiciona AFBA door di aliansanan strategico cu asociacionnan internacional, trece perspectivanan nobo na e tereno local.
