Diabierna awo, 24 di November
ORANJESTAD (AAN) — Diabierna 24 di November, lo tuma lugar e fundraising pa recauda fondo pa Fundacion Autismo Aruba. Den un rueda di prensa reciente, señora Carolina Thiel-Span, Relacionista Publico di FAA, a haci un introduccion tocante e evento aki.
El a informa cu e aña aki lo tin un Fundraising Dinner, cual ta e campaña mas grandi cu nan tin pa fin di aña. Carolina a subraya cu Fundacion Autismo Aruba ta ricibi diferente tipo di donacion durante henter aña, y cu esaki nan ta desaroya tur nan proyectonan. E ta nifica cu FAA no a haya ningun tipo di subsidio, sino cu e ta completamente dependiente di donacion di pueblo di Aruba. “Nos ta purba pa tur aña haci un evento un tiki mas grandi, unda nos por sera conoci cu hendenan nobo y mas hende por sera conoci tambe cu Fundacion Autismo Aruba”, Thiel-Span a menciona.
El a agrega cu e aña aki un biaha mas e fundacion ta partner cu Amsterdam Manor Beach Resort, y den e caso aki, e evento lo tuma lugar den e restaurant Passion on the Beach.
Seguidamente, e Social Marketing Manager di Amsterdam Manor Beach & Resort, señora Charity Maduro-Kock, a hiba palabra y a expresa cu como parti di nan responsabilidad social, Amsterdam Manor tur aña ta contribui den duna bek na comunidad.
El a splica cu añanan anterior nan tabata organiza un caminata hunto cu Fundacion Autismo, y e aña aki nan a pone e Restaurant Passion na disponibilidad pa e fundraising tuma lugar. Tambe Byron Lessier a bin dilanti y informa cu e capacidad di e restaurant ta pa cien persona, y a sugeri pa cumpra nan ticket na tempo pa asina no cay afo di e fundraising aki pa yuda Fundacion Autismo Aruba.
El a indica cu pa varios aña e fundacion ta concientizando e comunidad tocante e espectro di Autismo y tambe nan ta haci campaña tocante inclusion social, educativo y na trabao. Nos tin informacion pa mayornan y pa educadornan tambe, riba e tema di autismo. FAA tin diferente material y manual pa lesa y nan ta reparti material pa cada scol tambe. Cada luna, Byron ta presenta e programa “Stima un Autista” na un radioemisora. Y asina tin diferente otro proyecto andando y na caminda.
