Minister Ursell Arends a difundi:
*DOW lo anuncia destaho publico awe
ORANJESTAD (AAN)-- “Loke mi kier trece dilanti ta cu na 2012 Aruba a conoce un ley di cacho bao Gabinete Wever Croes-1, y a introduci tambe un Plan Nacional pa atende cu cachonnan riba caya, y bao Gabinete Wever Croes-2, Ministerio di Naturaleza a asumi e responsabilidad pa loke ta trata bienestar di animal. A adapta e plan di e tempo ey y a crea un ‘National Plan for Street Animals’ miho conoci como NPSA”, Minister Ursell Arends a señala, refiriendo na e tema “E bienestar di nos Animalnan”, durante e conferencia di prensa di gobierno, Dialuna awo.
Minister Arends a divulga kico ta e desaroyonan y e logronan alcanza caba durante e ultimo dos añanan. “Nos a introduci varios di e stapnan cu nos a compromete nos mes pa loke ta trata e plan di maneho di NPSA. Nos a introduci les material pa scolnan, nos a crea un plataforma unda cu por registra e mascotanan, atravez di e varios veterinarionan cu ta traha na Aruba, y alavez nos a inicia un campaña di concientizacion, caminda nos kier crea doñonan di mascota responsabel”, e dignatario a menciona.
E mandatario a difundi informacion tambe tocante otro proyecto cu ta bay cuminza, cu yama: “Animal Control Department”. DOW lo anuncia awe e destaho publico pa un proyecto cu lo ta situa na Kibaima, mirando cu Aruba ta den un situacion di sobre poblacion di tanto cacho como pushi. E centro di control di animal ta completamente yen; ademas, e fundacionnan cu ta atendiendo cu e problematica aki, tambe a yega nan maximo capacidad, y mester bin solucionnan practico y holistic.
“Pesey Gobierno di Aruba awe ta anuncia cu ta bay bin un Departamento di Control di Animal na Kibaima, caminda lo tin posibilidad pa un total maximo di 80 cacho y 40 pushi”, Minister Arends a señala, agregando cu e facilidad actual di Centro di Control di Animal na Wayaca por acapara so 8 cacho y 4 pushi.
“Y esaki ta laga nos cu un buraco sumamente grandi, mirando e situacion cu tin actualmente den nos comunidad, ora ta trata di cacho y pushi y kizas otro tipo di animalnan tambe.
E Centro di control di animalnan na Kibaima, tambe lo tin e tarea di acapara otro tipo di animal. E mandatario a reitera cu e destaho publico pa e Centro di Control na Kibaima lo wordo anuncia awe, 21 di November y te cu 20 di December, interesadonan por haci peticion.
“Mi kier haci un yamada na tur esnan cu ta interesa pa desaroya e facilidad aki pa Gobierno di Aruba, pa haci uso di e oportunidad, mirando cu prome cu fin di 2024 e centro aki mester ta cla, pa asina aki por cuminza atende cu e problematica na un forma mas holistic y structural, Minister Ursell Arends a señala.
