ORANJESTAD (AAN): Recientemente, Aruba Bank a organiza un evento “Business Mix & Mingle” pa su clientenan corporativo na Secrets Baby Beach,
unda empresarionan, directornan y partnernan a reuni pa un anochi di conexion y intercambio.
E localidad a ofrece un ambiente excepcional, combinando un gran atmosfera cu a inspira, creando e escenario ideal pa networking significativo. Durante e evento, a reuni caranan nobo y conoci, generando diferente oportunidad pa colaboracion, dialogo y futuro cooperacion.
E anochi tabata hopi special, ya cu Aruba Bank a celebra recientemente su aniversario di 100 aña, un milestone basa riba confianza, partnershipnan fuerte y exito comparti. Durante su palabra, Miembro di Gerencia, Head of Corporate Banking and Platinum Banking, Ramon Mas a expresa su agradecimento pa e confianza continuo di clientenan corporativo y a enfatisa e rol importante cu negoshinan local ta hunga den economia di Aruba.
E evento tambe a pone enfasis ariba liderazgo nobo den Aruba Bank. Sr. Rob de Ridder a wordo nombra recientemente como Managing Director y Chairman di e Management Board na 2025. Ademas, cu efecto di 1 di januari 2026, Señora Marleen van der Borgt a wordo nombra como Managing Director di Aruba Bank. Cu mas di 12 aña di experiencia den e Banco y un base fuerte den finansa strategico, “asset liability management”, “risk management” y liderazgo, Marleen ta extraordinariamente posiciona pa guia Aruba Bank den su proximo capitulo.
E evento tambe a marca un momento pa mira pa dilanti, reafirmando e compromiso di Aruba Bank cu innovacion, sostenibilidad y excelencia den servicio, asina mes reconociendo nombramentonan importante di liderazgo pa guia e banco den su proximo capitulo.
Aruba Bank su Business Mix & Mingle a confirma di nobo e posicion di Aruba Bank como un partner financiero di largo plazo, dedica na crece hunto cu e comunidad empresarial di Aruba.
