Liderato Hoek, Hefe Servicio Ambulance:
ORANJESTAD (AAN): Liberato Hoek, Hefe di Servicio di Ambulance ImSan, den entrevista cu DIARIO, a haci un yamada na comunidad, pa duna respet na e personal di ambulance, p’asina nan por eherce nan trabao cu seguridad.
“E personal no ta bay pa wordo insulta, agredi, y falta nan respet. Nos tur ta brinda servicio na momento cu esaki ta necesario, pero nos mester di espacio tambe pa nos por haci esaki na un manera profesional.
“Mi no ta kere cu ta na su lugar pa falta personal di ambulance respet, insulta of agredi nan, pasobra mi ta kere cu hunto nos lo por zorg pa e cuido medico wordo duna na cualkier hende cu tin mester di esaki”, señor Liberato Hoek a enfatiza.
El a splica cu hopi biaha personal di ambulance tin problema cu esaki, principalmente cu hendenan cu ta bao influencia di alcohol. “Na e momento ey nan no ta duna nos espacio pa haci nos trabao, of nan ta cuminza insulta strobando, eigenlijk, duna cuido na e persona cu ta nan mesun famia of cu ta cerca di nan”, señor Hoek a menciona, y a reitera su peticion pa duna respet na personal di ambulance pa nan por haci nan trabao manera mester ta, profesionalmente. Si no, nan mester acudi na polis pa duna nan e sosten cu nan mester.
