Ben Figaroa di TSPA ta haci apelacion na usuarionan di nos beachnan
ORANJESTAD (AAN): Aruba ta un dushi luga pa biba y pa turistanan bishita. Na Aruba semper tawatin bon ambiente den e areanan di lama. Den e temporada aki, tin hopi trafico banda di lama compara cu den pasado. Nos lama y beachnan ta hopi bishita pa turistanan. Y den e temporada di Cuaresma, hopi local lo bishita e areanan aki tambe. Y e areanan aki lo bira mas druk.
Señor Ben Figaroa di Tourism Security Patrol Aruba (TSPA), ta haci un apelacion na pueblo di Aruba pa ta mas consciente pa e siguridad di tur ciudadano pero tambe pa e turistanan cu ta haci uzo di nos beachnan den e temporada nos dilanti. Hunto nos por duna mas aporte na e sector turistico y demostra cu di berdad Aruba ta un dushi luga pa bishita.
Tambe ta pidi cooperacion pa mantene nos beachnan limpi. Señor Figaroa a indica cu ainda tin hende cu ta bay laga nan saconan di sushi atras riba e areanan turistico aki cu ta un mal bista pa tanto nos mes como ciudadanonan di Aruba pero sigur tambe pa nos bishitantenan di exterior. E ta pidi pa tur hende hiba nan saco di sushi ora di bishita e areanan aki, y hiba nan saco bek cas cu nan sushi. El a remarca cu no ta tur dia tin servicio pa recoge sushi y evita esakinan wordo hiba lama pa e biento fuerte.
Señor Figaroa a remarca cu e trabou di TSPA no ta solamente e siguridad rond di e area di beachnan, y ta vigila y tira bista riba e actividadnan cu ta pasa riba e areanan aki, pero tambe nan ta tira bista si tin sushi rond y ta alerta pa e instancianan encarga bin recoge a sushi. Pero e yamada na nos comunidad ta keda pa sea consciente y responsabel y mantene nos beachnan limpi teniendo cuenta cu nos pilar economico, esta nos turismo.
