ORANJESTAD (AAN): Dentro di poco Aruba lo ta lansando su Digital Corona Certificate (DCC) cu ta un sistema digital cu ta contene certificadonan oficial relaciona cu COVID- 19 conforme reglanan Europeo.
E diferente certificadonan cu por ser encontra den e DCC ta entre otro.
- DCC pa comproba cu e persona ta vacuna debidamente (disponibel desde 9 augustus)
- DCC Test negativo pa comproba cu e persona a test negativo pa Covid-19 (disponibel fin di augustus)
- DCC Test positivo pa comproba cu e persona a recupera di COVID-19 (disponibel fin di augustus)
E diferente Digital Corona Certificate (DCC) ta conforme reglanan Europeo pero no por wordo confundi cu un corona passport y tampoco e certificado aki no ta un garantia pa por drenta tur pais na Europa.
Cada pais tin nan mes un condicionnan y exigencianan pa por drenta e pais. Riba www.reopen.europa.eu por check e condicion di cada pais den Europa. Aruba ta cuminsa cu e DCC di vacunacion cu ta disponible for di 9 augustus 2021.
Tin diferente forma con bo por ricibi bo Digital Corona Certificate.
Pa ricibi bo DCC di vacunacion, bo DCC test negativo pa biaha of bo DCC positivo pa comproba recuperacion, bo por drenta den bo Aruba Health App of bo por print esaki via www.dvg.aw .
Si bo persona no tin acceso na internet tambe por yama 280.0101 of pasa personalmente na DVG situa na Caya Ing. Roland Lacle #4 na Oranjestad pa un copia di esaki.
Pa ricibi bo DCC test negativo den bo Aruba Health App ta importante pa acudi na un laboratorio cu ta conecta cu Aruba Health App pa e resultado por drenta den bo app of bo lo mester print esaki via www.dvg.aw of yama 280.0101 of pasa personalmente na DVG.
Ta importante pa nota cu na momento cu bo print e DCC e mester ta un PDF file, screenshot no ta wordo acepta como comprobante.
Pa haci uzo di bo DCC controla e condicionnan di e pais cu bo ta bay bishita riba www.reopen.europa.eu.
Ta importante pa controla cua sorto di test ta wordo acepta, si tin test adicional cu a e pais ta exigi y con largo bo DCC ta valido na e pais(nan) cu bo kier bay bishita.
Paisnan na Europa pero tambe otro Pais por verifica e EU-DCC como un comprobante sigur. E DCC tambe por worde exigi pa haya acceso na cierto eventonan of pa drenta establecimentonan na cierto paisnan.
