ORANJESTAD (AAN): Prome Minister Evelyn Wever-Croes a laga sa cu e decisionnan cu a wordo tuma recientemente relaciona cu e maneho pa combati Covid-19 a wordo poni den e balansa y ta pa no pone mas peso riba bida y salud di hende.
E siguiente aspecto ta esun financiero y economico di dje. Ora cu a traha e presupuestonan ta traha nan cu un bista realistico y ta tene cuenta cu Aruba a recupera mas mihor di loke a tene cuenta cu ne, a bisa.
Tin un 'buffer' eynan pasobra tabata bayendo mas mihor cu loke a conta cu Aruba lo por a recupera. Cu e decisionnan recien, e mandatario ta kere cu por sigui atende cu FASE, por ehempel y cu e otro retonan financiero, pero si ta pa un periodo cortico.
"Pesey mester cooperacion di tur hende pa den e siguiente dianan aki uza e tapaboca tur caminda cu bo bay. Paden e ta obligatorio. Pafo e no ta obligatorio, pero bo no kier haya bo den un grupo di hende y hende ta nister riba bo, anto pasobra ta pafo bo no tin'e. Sali cu ne tur ora pa bo no lubida. Tene e distancia for di hende, sigui instruccionnan ta e unico manera cu nos por combati esaki", Wever-Croes a expresa.
