Aruba a wordo bon representa durante Conferencia Internacional di 'Child and Family Maltreatment' na San Diego

Parlamentario Darlaine Guedez-Erasmus (MEP):

ORANJESTAD (AAN): Recientemente a tuma lugar na San Diego e di 39 edicion di e conferencia 'Child and Family Maltreatment'. E conferencia aki pa 4 dia largo a brinda e oportunidad pa siña, explora, reflexiona y conecta cu otro profesionalnan.

            Tur aña mas di 100 pais ta participa na e evento aki. Ta indica y splica e metodonan y investigacionnan mas recien riba casonan di abuso di mucha of diferente sorto di violencia, asina Parlamentario Darlaine Guedez-Erasmus di Fraccion di MEP a duna di conoce.

            Tur e cuater dianan aki, tabata tin diferente orado pa asina por a duna informacion di diferente angulo riba e tematica importante aki. Pa varios aña caba profesionalnan di Aruba ta asisti e conferencia pa asina keda al tanto di tur loke ta pasando riba e tema aki y asina por ricibi informacionnan y implementa tur locual cu ta aplicabel y realisabel den nos ley y manehonan.

            E aña aki, señora Mr. Alida (Lili) J. Rasmijn-Marval, docente, hurista y escritora di e rapport ‘Aanpak huiselijk geweld op Aruba’ a haya e oportunidad pa presenta su investigacion haci na Aruba ‘Women’s experiences of Intimate partner violence in heterosexual relationships in Aruba and the negative health consequences’.

            Den un sala cu personanan di diferente profesion a duna un resumen di e resultado di e investigacion. Colega Parlamentario Raymicheline Raymond tambe a haya e oportunidad pa hiba palabra den e sesion aki. 

            "Aruba ta un pais chikito, pero aki por mira cu e impacto di e investigacion y presentacion tabata grandi riba tur e profesionalnan rond di mundo. Nan por a haci preguntanan y asina por a mira nan interes ta grandi pa loke ta pasa den Caribe tambe. Como Parlamentario mi ta haya ta importante pa profesionalnan di Aruba keda bay e conferencia aki. Pa medio di e conferencia aki profesionalnan di Aruba a cera conoci cu e concepto di Family Justice Center y cu gobierno a mira e importancia di dje y cu lo cuminsa duna servicio e aña aki", Parlamentario Guedez-Erasmus a declara.