Aruba a perde otro musico impactante den persona di Shon Pa Kelly

Conocido trompetista di mariachi

ORANJESTAD (AAN): Riba Dialuna, un otro informe tristo a drenta cu un otro musico di trayectoria largo a bay sosega.  Ta trata aki di Pablo Kelly, conoci den pueblo como ‘Shon Pa Kelly’, kende a fayece cu 89 aña di edad.

   Shon Pa tabata conoci pa tur hende, como e trompetista cu algun biaha a lidera e popular ‘Mariachi Aruba’ pa basta tempo.  Un persona hopi social, intelectual, y cu carisma pa tur su famia y amigonan.  E tabata un musico cu bo por depende riba dje, y e tabata hopi orguyoso di su musica produci durante tocamento.

   E sonido di trompet di Shon Pa tabata uno hopi claro, preciso, y cu berdadero volumen.

   Musica di Ranchera tabata e pasion di Shon Pa, y pesey mes den tur su trayectoria activo como integrante di Mariachi, el a yega di organiza diferente Festival di Musica Ranchera, y a duna conseho na diferente otro Mariachi riba aspectonan di organizacion.  Su trompet a keda marca tambe riba algun disco cu el a graba hunto cu Mariachi Aruba.

   Fuera di Mariachi Aruba, Shon Pa a yega di forma parti tambe di e.o. Mariachi Perla di Aruba, Mariachi Lirios del Campo, y tambe Mariachi Orguyo.

   Di parti di DIARIO ta bay palabranan di condolencia na famia y amigonan di Shon Pa.