NEW DELHI: Un fenomeno poco usual a wordo registra na India, ora cu un baby mucha muher a nace y e tabatin 8 embryo den su stoma chikito.
E mucha muher ya a wordo opera, y tur cos a sali satisfactoriamente, aunke e spanto tabata hopi grandi, pasobra si nan no a detecta esaki na ora, e lo por a sufri di consecuencianan fatal pa su organismo.
Hopi a puntra con esaki por ta posible, y e contesta ta cu e fenomeno aki ya ta existi! Aunke e no ta pasa hopi biaha. Docternan sa bon con pa trate, sin cu casi no ta aparece complicacion ora di drecha e problema. Aunke e ta parce di ta describi como un tumor, realidad ta trata di un complicacion cu por presenta su mes durante e embarazo, ora cu un embryo cu ta haya su mes den un mal situacion, ta wordo absorba pa otro. Den caso di e mucha muher aki, tabatin ocho embryo den mal estado hunto cu esun di dje mes, y esey a finaliza ora cu su fetus a absorba tur e otronan den su curpa prome cu el a nace.
E ta conoci pa mundo medico como ‘fetus in fetu’, y e fenomeno aki ta wordo resolvi cu saca cada embryo via un operacion cirugico, y nan tin un forma di un tumor, y pesey nan ta wordo considera asina. Den e caso di e mucha muher aki na India, e ocho embryo haya den su curpa ta e cantidad maximo cu a yega di wordo haya di casonan registra te cu awor rond mundo.
E mucha muher cu a wordo opera, lo por sali di Hospital aki algun dia, y Docternan ta convenci cu e lo bay bek cas hunto cu su mayornan pa cuminza su bida normal, leu for di Hospitalnan.
