Empleado Filipino trahando riba Symphony of the Seas
- Cinco dia prome e barco tabata na Aruba
- El a admiti caba di ta haciendo esey pa 2 luna largo
ORANJESTAD (AAN): E barco crusero Symphony of the Seas cu Diamars siman pasa dia 27 di Februari 2024 a ancra for di 8’or di mainta te cu 9’or di anochi na Waf di Oranjestad, tabatin un famia abordo cu a subi e barco pa disfruta di 8 dia di un viahe den Southern Caribbean. E viahe a sali for di Florida, y a bishita Aruba, sigui pa Curaçao, despues a pasa na e isla Labadee na Haiti, y a regresa Florida bek.
E viahe di Royal Caribbean a start riba Diabierna 24 di Februari. E famia aki ta consisti di un señora cu su dos yiu muher. Nan tres a keda den camber, y nan tabatin un ‘Stateroom Attendant’ Filipino cu tabata haci nan camber limpi, drecha esaki tur mainta y anochi, y nan conoce como ‘Arvin’.
Riba Diasabra 25 di Februari, un di e yiu muher tabata den baño y a bay rek pa recoge algo na piso, y aki el a bin descubri un camera poni bao di e labamano ta grabando. Mesora a bati alarma cerca oficial di Security abordo. Nan a yega eynan, y pafo di e camber a cuminsa papia cu e famia, kendenan a splica cu nan a usa e baño multiple biaha mientras e camera scondi tabata graba. Mientras nan ta papiando cu nan pafo di e camber, diripiente e trahador Arvin Mirasol a aparece eynan.
Aki mesora Security a detene e trahador, y a hibe pa un Camber isola riba e barco, unda el a keda wanta aden. Pues ora e barco a yega Aruba, e homber aki ya tabata cera den isolacion.
E barco a regresa Florida bek riba Diadomingo 3 di Maart 2024, y na su yegada autoridadnan di Broward County na Florida, a subi e barco crusero pa aresta e Filipino Arvin Mirasol cu tabata wanta den e camber di isolacion.
E empleado Arvin Joseph Mirasol, di 34 aña di edad naci na Filipinas, a wordo baha cu man den boei for di e crusero Symphony of the Seas. E camera a wordo confisca tambe.
Hopi video a ser haya: Oficialmente e ta aresta bao acusacion di a comete seis acto di “video voyeurism”. Tambe lo wordo acusa di posesion y produccion di pornografia infantil.
Ora cu autoridad a cuminsa interoga e Filipino, el a admiti di a pone camera den varios camber. Autoridad a confisca un USB Memory Stick cu ta contene numeroso video di muhernan ta kita paña den baño, y imagen sunu di muchanan. Un di e muchanan aki a wordo describi di ta parce tin 10 aña di edad.
Riba su smartphone tambe a haya monton di video. Aki e Filipino a bisa investigadornan, cu e “kier controla su mes, pero e no por”. Ora cu a puntre con e ta dicidi den cual baño e ta pone camera, aki e Filipino a bisa nan: “Si mi gusta esnan cu ta den e camber ey, mi ta pone e camera”. El a bisa cu e ta prefera graba mucha muhernan di 16 aña bay ariba.
El a admiti di sa cu loke e ta haciendo ta ilegal. E mes a declara cu tin biaha ora cu huespednan ta bañando, e lo drenta e cambernan y sconde bao di cama, y asina scondi ta graba nan sunu cu su smartphone.
Kier identifica victimanan: Mientras tanto, autoridad na Florida a indica cu e investigacion di spionahe den baño aki ta sigui crece, y ya caba nan a haya lista di e cambernan cu Mirasol tabata atende desde December 2023 pa awor, pasobra nan kier identifica tur esnan cu ta riba e video relaciona cu e caso.
Ta monton di video tin, cu el a graba for di December 2023 te ora di su aresto cu ta 3 di Maart 2023. Pa awor e Filipino ta deteni keto bay na Pompano Beach na Florida.
Vocero di Royal Caribbean a indica cu e compania tin cero tolerancia pa e actitud inaceptable aki. Pesey mes mesora nan a raporta e caso na autoridad, y a retira e Filipino di trabao. Nan a bisa di lo sigui coopera completamente cu autoridadnan riba e caso aki.
