Miangela Ras, director CEDEHM:
ORANJESTAD (AAN) – Miangela Ras, director di CEDEHM (Centro di Educacion di Hende Muher), a participa den un Congreso cu a tuma lugar na Universidad di Aruba, duna pa señora Benedicta Deogratias, di “Center for life long learning” den cual CEDEHM y mas stakeholders tame a participa.
“E meta di awe ta concientiza pueblo y wanta nos mes den veld skerpi, riba e tema di violencia di genero. Esaki ta ora tin violencia entre hende homber y hende muher”, Miangela Ras a comenta.
El a subraya cu CEDEHM su enfoke ta e desigualdad di genero. Pues, e desigualdad cu ta existi entre hende homber y hende muher, cu ta un di e causanan cu ta origina e problema.
“Como instancia e aña aki nos ta bezig caba hunto cu Fundacion FEPA, pa ekipa hende muher pa nan no keda atras. Nos ta bay tin gruponan di sosten pa e gruponan di violencia domestico, nos ta bay partner up cu e actividad di Minister Presidente, Diabierna awo na Renaissance Convention Center”, el a indica.
Kiermen CEDEHM e aña aki no ta bay tin un actividad apart, sino cu e ta hunto cu e actividad di awe, Dia 8 di Maart, Dia Internacional di Hende Muher.
Miangela a expresa cu CEDEHM ta manca pasobra no tin suficiente personal, pero el a bira creativo y a dicidi pa hinca Fundacion pa Hende Homber den cas, pa asina nan trece e casonan na CEDEHM, aunke nan no tin un trahado social actualmente.
CEDEHM ta yen tur dia, y nan ta atende casonan di hende homber y hende muher tambe. Miangela a expresa cu na Aruba nos ta biba den un cultura machista di tanto hende homber como hende muher.
“Nos a wordo condiciona pa ta asina, nos a wordo getrain nos mente. Con e sociedad a condiciona nos pa keda den e rolnan ey. Bo sa cu un conciencia colectivo (ora nos tur ta pensa na un manera) bo no ta yega cambi’e den un-dos-tres. E ta tuma tempo, pero un caminda bo tin cu cuminza”, Miangela a subraya.
Tin cu cuminza kibra e fibranan poco, poco. Miangela a bisa como ehemplo cu ora di tende un joke sexista nos no ta hari, ora nan ta papiando mal di un hende muher, cu sa pasa, bo no ta doemee den esey, bo ta para esey.
Segun Miangela, mas hende haci esey, ta trece un cambio. Pero si nos ta keda acepta nunca e cambio ta bin. E ta bay tuma un compromiso conciente, y si tur hende ta stop expresionnan sexista e ta haci un diferencia.
