Apesar di tur reto social actual toch cifra di embarazo hubenil a baha drasticamente

Parlamentario Darlaine Guedez-Erasmus

ORANJESTAD (AAN): Riba Diamars cu a pasa, e grupo di Parlamento cu ta e Comision Fiho di Famia y Cuido di nos grandinan a worde invita pa un presentacion di Wit Gele Kruis.

   Durante e presentacion aki a ricibi resultadonan di un investigacion haci pa señorita E. Niemarkt cu ta un stagiaire na Wit Gele Kruis. E punto di enfoke di e investigacion aki tabata pa determina cua posibel factornan den ambiente di un hoben por forma un risico y asina conduci na embarazo hubenil. E pregunta formula di e forma aki: “Welke omgevingsfactoren hebben invloed op het risicovolle gedrag van meiden tussen de 14 en 21 jaar met een zwangerschap tot gevolg?”

   Algo cu sigur a resalta pa mi durante e presentacion aki ta cu e cifranan di embaraso hubenil a baha. Na aña 2020 nos a conoce un total di 73 mama hoben y final di 2021 esaki tabata 43 mama hoben. Esaki ta un reduccion drastico di 30 mama hoben, casi mitar di e cifra di 2020.

   Locual cu a contribui na e reduccion aki ta cu desde 2014 a cuminsa cu un programa di educacion sexual na scolnan. Un total di 26 scol di e klasnan 5de y 6de a ricibi e programa aki. E ekipo di Wit Gele Kruis ta hopi contento cu e resultado di e programa di educacion sexual y di e forma aki tambe ta demostra e impacto di programanan asina.

   Nan a informa cu e ta importante pa cuminsa na un edad di mas o menos 10-12 aña, pasobra den e edad aki e muchanan ta retene informacion mas miho.

   Como presidente di Comision Fiho di Famia y Cuido di nos grandinan mi tin cu bisa cu mi ta hopi contento y kier gradici stagiaire E. Niemarkt pa a haci e investigacion aki y asina contribui informacion valioso pa nos. Mirando e reduccion di cifra di mamanan hoben, e bon recepcion di e programa di educacion sexual y e impacto cu esaki tin riba nos hobennan mi ta haya hopi importante pa nos sigui enfoca riba esaki. Nos pais tin varios retonan social pero e ta bunita pa mira con poco poco nos ta bay back riba e caminda corecto unda nos por guia nos hobennan, brindanan informacion corecto y asina sigura nan salud fisico como tambe salud mental. Hunto nos ta crea hobennan bon informa y conciente!