Minister Arends ta trahado diligentemente den esaki
ORANJESTAD (AAN) -- Minister Presidente a duna informacion tocante e resultado di e Rapport di Instituto CARMABI, tocante e estado di e coralnan na Aruba.
E dignatario a splica cu den su investigacion, CARMABI a enfoca riba tres area. Den un Aruba a score bon, den e di dos “mas of menos” y den e tres a score malo, manera por lesa den un prome articulo.
“A base di esaki, Conseho di Minister, na Februari 2021 a institui un Comision Multidisciplinario, cu ta consisti di diferente departamento, cu e meta pa nan bin cu solucionnan riba termino cortico, mediano y largo.
Nan a cuminza traha riba e solucionnan aki, y algun ya caba ta den ehecucion. Na Augustus nan a entrega e rapport, na September nos a haya gobierno nobo, y mesora mi a traspasa tur cos den man di Colega Ursell Arends, cu ta esun encarga cu naturaleza.
“El a tene un conferencia di prensa algun siman despues pa anuncia esaki, y e ta trahando cu su ekipo pa soluciona e diferente puntonan cu a wordo treci dilanti den e rapport”, e dignatario a menciona.
E rapport aki ta menciona algun caminda cu Aruba mester pone extra atencion, pa asina mehora e estado di Aruba su coralnan.
“Y manera mi a bisa, e ta hopi importante pasobra nos coralnan ta traha e santo blanco bunita, cu ta yuda nos pa atrae tanto turista, cu ta nos pilar economico”, Minister Presidente a reitera.
El reitera tambe cu esaki ta den man di Minister Ursell Arends y cu nan a duna Parlamento tur informacion, y cu e tin atencion di gobierno y cu gobierno ta hopi diligente riba esaki. “E ta un tema cu tin prioridad hopi, hopi halto, y mi ta contento cu den e gobierno aki, nos a dicidi pa cambia e sistema cu nos ministerionan ta hinca den otro, y Naturaleza y Medio Ambiente pone den man di otro minister cu tin mas energia y mas tempo pa por atende cu e tema aki. Pues, mi por asegura e comunidad di Aruba, cu e situacion di nos coralnan berdad ta preocupante, pero nos ta na tempo ainda pa por coregi locual a bay fout. No ta asina cu nos awanan ta contamina, ni cu e ta trece daño pa comunidad y pa hende. Nos tin un gobierno cu ta serio, nos ta trahando riba solucionnan, y mi tin tur confianza cu cu dentro di poco nos ta soluciona e situacion aki”, Prome Minister a conclui.
