APA a habri aña 2024 kibrando record den turismo crucero

ORANJESTAD (AAN): Aña 2024 a habri di un manera hopi positivo pa Aruba Ports Authority N.V. (APA). Den e prome siman tabatin dos first call.

Un di nan tabata e Norwegian Cruise Line (NCL) - Viva cu ta e crucero di mas nobo den e flota di NCL. Norwegian Viva ta un crucero di clase superior di Norwegian Cruise Line. E ta e di dos di e seis barconan di e Project Leonardo-class ships. Norwegian a ricibi e barco riba dia 3 di augustus di aña 2023 y a realisa su inauguracion net un siman despues.

            Norwegian Viva ta conta cu un itinerario di 9 dia (New Year’s Cruise). E crucero, Norwegian Viva, a trece mas cu 3600 bishitante riba nos isla riba e di dos dia di aña. Norwegian Cruiselines ta e di tres compania crucero cu ta trece mas pasahero pa nos isla.

            E di dos barco crucero cu a yega nos isla durante e prome siman di aña ta Royal Caribbean - Oasis of the Seas, cu ta forma parti di e Oasis Class ships. Oasis of the Seas ta un di e cruceronan di mas grandi cu ta den operacion na e momentonan aki. Riba dia 3 di januari, Oasis of the Seas a trece mas di 6700 bishitante pa Aruba, ta importante pa menciona cu esaki tabata un record pa APA y pa Aruba pa loke ta e cantidad di pasahero pa un solo barco di crucero.

            Di e manera aki a kibra e record di su crucero ruman Symphony of the Seas cu den luna di november di aña 2023 a trece alrededor di 6500 bishitante riba nos isla. Oasis of the Seas tambe ta conta cu un itinerario di 9 dia (New Year’s Cruise).

            E delegacion di Aruba cual ta consisti di representantenan di Aruba Ports Authority N.V., Aruba Tourism Authority, Autoridad di Douane y Immigracion y e barco su agencia local kende ta yama e barco su Capitan, tripulacion y pasaheronan bonbini y a haci e acostumbrado intercambio di plakkaat pa conmemora e first call. 

            “Despues di a cera aña 2023 cu mas di 98% di recuperacion den pasahero compara cu 2019, APA ta hopi satisfecho cu e comienso di 2024 cu ta proyecta di ta un bon aña pa e industria di crucero di Aruba. E bishitanan inaugural di Norwegian Viva y Royal Caribbean Oasis of the Seas ta demostra cu e liñanan di crucero ta sigui deposita nan confiansa den Aruba”, di acuerdo cu e C.E.O di APA, Marc Figaroa.

            APA ta sigui traha duro pa mantene un contacto estrecho cu e liñanan mas importante di crucero, pa sigura cu asina Aruba ta parti di nan itinerarionan. E rol di e industria di crucero ta importante pa nos isla, ya cu ta haci un contribucion significante na e economia di nos isla.