Minister Ursell Arends: Campaña ta continua
ORANJESTAD (AAN): Den aña 2024 Minister Ursell Arends ta continua cu e campaña microchipping di mascota. E biaha aki ta enfoca pa microchipping di ambos cacho y pushi, conscientisando doñonan di mascota di e benificio pa microchip nan mascota.
Kico ta Microchipping?
Microchip ta un obheto micro (chikito) cu tin informacion di mascota y su doño. E chip aki ta wordo inyecta bou di e cuero di un cacho of pushi. E microchip ta hopi chikito y ta wordo pon’i den menos di 2 seconde via un hangua pa un veterinario profesional.
Asina cu e tin e microchip e veterinario ta registra tur informacion di rasa, genero, nomber, caracteristica y informacion di e veterinario y doño den un sistema di registracion di mascota central. Ministerio di Naturalesa a desaroya un sistema di registracion di mascota yama “Aruba Pet Registry” den cuadro di esaki.
Doño di mascota por microchip nan cacho of pushi pa solamente Awg. 25,-, un suma subsidia door di Ministerio di Naturalesa, y por haci un cita na tur veterinario. E pasonan cu mester tuma ta lo siguiente:
- Scoge un veterinario preferi
- Tuma contacto cu e veterinario pa haci un afspraak pa microchip bo mascota
- Presenta riba e fecha di afspraak y paga solamente Awg. 25,- pa e chip
Dicon microchipping ta importante?
E benificio primordial di e microchip ta, cu den caso cu bo mascota perde e por wordo identifica via e microchip reader door di tur veterinario, fundacionnan, KPA, BCI y tambe Centro di Control di Cacho. Esaki tin como beneficio cu e mascota por yega mas lihe na abo como su doño. Ora bo mascota tin su microchip e ta wordo automaticamente registra na e sistema central “Aruba Pet Registry”, esaki ta crea un identidad propio pa bo mascota.
Microchipping ta importante no solamente pa bo mascota pero como doño di e mascota bo ta contribui tambe na un bon causa, cu ta enfoca ariba e desaroyo di e prome sistema di registracion central pa mascota di Aruba. Esaki ta un di prome pasonan pa haci un efecto positivo ariba e bienestar di nos mascotanan aki na Aruba.
Abo ta un doño responsabel pa bo mascota ?
Un mascota sea cacho of pushi por biba te cu 15 aña y si bo cuid’e bon e por biba hopi mas. Pero un mascota ta un ser bibo y domestico, esaki ta nifica cu e ta depende 100% di bo como su doño. Kico tur bo mester tene cuenta cu ne ora bo busca un mascota? Esaki ta un lista pa duna un bista di kico ta importante:
- Cuminda y awa limpi tur dia
- Luga cu sombra pa sconde for di elementonan natural entre otro: biento, solo y awa
- Microchip pa e wordo registra oficial como bo mascota
- Sterilisacion (spay & neutering) pa ambos macho y hembra pa evita cu e ta haya puppies of kittens inespera
- Cuido medico, vacuna, vitamina, medicamento contra carpata y bichi di curason etc.
Ban pone como meta e aña aki pa nos bira un isla ehemplar pa asina demostra cu nos ta doñonan responsabel pa nos mascotanan.
Por tuma contacto cu Centro di Control di Cacho na 5929777 of bishita www.amitaresponsabel.org pa mas informacion. Corda Microchip bo mascota pa asina e wordo registra oficial y tambe sterilisa bo cacho pa e no reproduci y contribui na e problematica di sobre populacion na Aruba. Ban sea doño responsabel pa nos mascota.
