Rapportnan di Banco Central a mustra kico Pueblo ta pensa di corupcion den politica - Cuanto placa di Pueblo Howell y Sevinger a gana mientras nan tabata sospechoso?
ORANJESTAD(AAN)- Un Gobierno nobo ta den formacion na e momentonan aki. Un Gobierno cu mester goberna Aruba den temponan cu mester di seriedad y den cual no por tin ningun sospecho y mancha riba personanan cu ta wordo encarga cu puestonan publico.
Ora pone opinionnan cu ta biba den Pueblo di Aruba hunto, ta mira cu no ta awor Pueblo ta pensa cu corupcion ta parti di mundo politico.
A mustra DIARIO riba rapportnan di Banco Central cu ta mustra cu Pueblo no tin confiansa den mundo politico. E gran mayoria di Arubiano ta pensa cu politica ta corupto.
Informantenan ta indica na DIARIO cu esaki ta un pensamento desastroso na un Estado di Derecho, caminda tin leynan cu segun un gran parti di Pueblo di Aruba ta na peliger pa mantencion debi na corupcion.
Mientras e periodo di formacion di un Gobierno nobo ta yega na su culminacion, uno di e prome prioridadnan cu mester tuma segun mayoria di informantenan di DIARIO, ta pa bini cu leynan cu ta exigi integridad den gobernacion.
Mayoria di personanan cu kende DIARIO a atende e asunto di corupcion ta mustra cu d balor di democracia ta basha abou mientras cu no tin leynan cu ta exigi integridad maximo den representacion di Pueblo y tur loke ta mishi cu trabou pa Pueblo.
Manera a wordo trece dilanti e actual formacion di Gobierno Wever-Croes 2 ta tuma luga a base di dos partido cu ta MEP y RAIZ, cu durante eleccion a tene duro na e concepto di Integridad cu awor segun informantenan mester bira prioridad.
“Un Estado di Derecho ta funciona ora Pueblo ta kere cu ta Ley ta dirigi e pais y no placa cu ta pasa bou mesa. Pa Aruba por scoge un rumbo nobo, integridad ta bini na prome luga y mester cuminsa cerca tur persona cu kier ta candidato pa haya un funcion publico. Mester scrap tur oportunidad cu ta stroba Pueblo di kere den su gobernacion y asina den su estado di derecho cu ta exigi pa ley wordo sirbi ciegamente,” a wordo bisa.
E prome paso cu mester tuma ta, cu na momento cu bira conoci cu un Miembro di Parlamento ta sospechoso di Husticia, e ta wordo suspendi y no ta haya placa di Pueblo den su cartera.
No tin palabra pa e sentimento cu den caso di Benny Sevinger y den caso di Allan Howell, sospechosonan di Husticia, ta sigui ricibi placa y distincion di e puesto halto di Pueblo.
A wordo mustra cu un persona den servicio di Gobierno ta wordo suspendi y no tin entrada si e bira sospechoso den caso di corupcion.
Segun tur informante e prome Ley cu mester pasa na Aruba, ta e Ley di Integridad cu ta exigi cu un Miembro di Parlamento no por ta wordo sospecha di un delito y cu na momento cu un persona wordo sospecha di un acto castigabel bou cual corupcion ya resorta, e ta bay cas.
“Pueblo mester tin confiansa den dignidad di personanan cu e ta paga pa traha na su interes. Mescos cu Ministro no por tin un strafblad of por ta sospechoso, un representante di Pueblo of cualkier persona cu ta ricibi placa di pueblo pa servicio, no por tin un record criminal of sospecho cu e ta parti di crimen,” a wordo trece dilanti.
Referencia a wordo haci na un caso di un ambtenaar cu a wordo acusa di malversacion di propiedad di Pueblo y cu a wordo suspende di trabou, cu awor aprobacion di Huez.
Allan Howell no por a regresa su trabou.
Segun informantenan Aruba ta drenta un temporada cu confiansa den gobernacion mester ta un asunto absoluto. E prome siguransa cu Pueblo mester haya ta cu a cera porta pa corupcion y tur crimen den representacion y tur trabou den servicio di Pueblo.
