American University School of Medicine Aruba a firma MOU cu un instituto educacional na Merca

ORANJESTAD (AAN): Diabierna mainta durante un conferencia di prensa convoca pa American University School of Medicine Aruba

cu hopi orguyo a anuncia cu nan lo bay asocia cu un Universidad di Merca cu yama ‘Hudson Valley’.

   Na e ocasion aki, Jawad Shaikh, kende ta chairman di directiva di American University School of Medicine Aruba a introduci Dr. Roger Ramsammy kende ta president di Hudson Valley Community College pa anuncia cu nan ta firma un Memorandum of Understanding (MoU), cual partnership sigur lo produci hopi beneficio na isla di Aruba, y tambe pa demas islanan regional den Caribe.

   A forma un acuerdo pa trece programanan academico di grado social pa e isla, y esaki lo ta un partnership unda un facilidad academico acredita na Merca lo bay ta disponible pa studiantenan di medicina na Aruba, como tambe e chens pa studiantenan di Hudson Valley y otro studiante na Merca por bin haya un programa di Medical Docter direct aki na Aruba.

   Segun Sr. Shaikh, nan ta hopi contento cu Diahuebs nan por a reuni cu Prome Ministro di Aruba Evelyn Wever-Croes, como tambe Ministro di Enseñanza Endy Croes, pa asina haya nan sosten pa e programa aki.  A splica e Ministronan kico e MOU aki ta bay nifica pa e isla di Aruba y region di Caribe.

   Door di e asociacion nobo aki di American University School of Medicine Aruba y Hudson Valley, nan lo ofrece un programa di Undergraduate consistiendo di lo siguiente:

  (*) Suministra studiantenan regional di Caribe y di Aruba di EPI, MAVO, GED, HAVO, y esnan di high school un hens pa haya un Associate’s Degree cu nan por afford via di Hudson Valley na American University School of Medicine Aruba (AUSOMA) via di distance-learning.

   (*) Suministra studiantenan di Pre-Medicina di American University School of Medicine un Associate’s Degree den Biological Sciences via di Hudson Valley na e campus di American University School of Medicine Aruba mes via distance-learning.

   (*) Suministra studiantenan cu e finalizacion exitoso di un programa di Pre-Medicine via di Hudson Valley cu e opcion di drenta den e programa di AUSOMA MD.

  (*) Suministra studiantenan cu e finalizacion di Associate’s Degree cu e opcion pa drenta scolnan afilia na State University of New York na Merca door di reglanan di transferencianan existente.

   “E programa ta un logro grandi pa suministra studiantenan di Merca, Aruba, y region di Caribe en general, opcionnan pa por sigui estudionan superior acredita na Merca,” segun Sr. Shaikh a bisa.  “Nos ta contento di tuma e paso importante aki y formaliza nos relacion pa fortalece e relacionnan di cooperacion den e areanan di educacion y otro actividadnan academico,” el a bisa.

   Na su turno, Dr. Ramsammy di Hudson Valley a bisa cu nan universidad tin mas di 50 aña di experiencia, y nan ta un institucion educacionla cu ta haci esfuerzo pa ofrece un educacion di calidad excepcional.  Pues ta un bon idea pa expande e capabilidadnan di Hudson Valley na un proceso di internacionalizacion cu ta permiti e tipo di alianza aki cu institucionnan di categoria mundial y keda na vanguardia di oportunidadnan di educacion superior na Aruba, na Caribe y resto di mundo”.

   Den e simannan venidero, American University School of Medicine, cu Hudson Valley Community College y Gobierno lo finaliza e logistica y detayenan adicional di e programa.  Mientras tanto por haya informacion adicional y e proceso aki caba riba nan website di www.ausoma.org

   Demas persona presente e mainta aki tabata Kanaan Baroud kende ta Director di Operacion di American University School of Medicine Aruba, Dr. Nazir Umrani kende ta Associate Dean di American University School of Medicine Aruba, y Judith DiLorenzo kende ta Vice-President pa Asuntonan Academico di Hudson Valley Community College.