Alumnonan a bay analisa oreanan di porco durante les Biologie

ORANJESTAD (AAN): E alumnonan di HAVO-4 di Mon Plaisir College na Playa, tabatin un dia interesante di practicum den les di Biologie.

   Cada grupo di studiante a ricibi nan dilanti, un berdadero orea di un porco pa asina nan por haci analisis, test, y traha un rapport di loke nan a mira.  Esaki den cuadro di haci e proceso di analisis bira uno mas util pa studiantenan siña mas di loke un porco tin.

   Tin di corda, cu ta conoci den ciencia, cu un ser humano y porco tin hopi aspecto similar cu otro.  Tanto e ser humano como un porco ta mamifero, y tur dos tin sistema di curpa comun.  E anatomia di un porco ta hopi igual cu esun di e ser humano.

   Esey nifica, cu ora bo analisa curpa di un porco, incluyendo su oreanan, e ta bay contabo hopi di nos mesun curpa, y ta yudabo haya un forma pa sigui explora y haya sa mas di e ser humano.  E alumnonan di Mon Plaisir HAVO a participa cu yen animo y interes den e les di practicum aki, manera por mira riba e potretnan.