Alexia Chin a entrega reconocimento na comision organizador

ORANJESTAD (AAN): Diasabra anochi durante un anochi di sorpresa pa Alexia Chin, kende recien a keda corona como Miss Internacional de los Mares y del Turismo na Costa Rica, tabatin un extra sorpresa mas.

   Esey ta ora cu Alexia mes a yama dilanti tanto Robin Croes Ponson, Susan Boekhoudt, y tambe Edson Everon pa e duna nan un reconocemento.

   Alexia a bisa nan hopi danki, cu nan ayudo for di tempo cu el a participa den certamen di Miss Youth.  “Boso a yudami hopi, y pesey nada di esey lo no ta posible sin boso,” el a indica.

   Na cada uno, Alexia a bisa nan masha masha danki, y e ta considera nan como su famia nobo.

   Tanto Robin Croes Ponson, Susan Boekhoudt, y Edson Everon ta forma parti di e comision cu ta organiza Miss Youth Aruba.

   Ora di a habri regalo, cada uno a haya un bunita cuadro di metal cu mensahe y potret di Alexia Chin riba dje.  E miembronan a keda sorprendi cu esaki y a keda encanta cu e gesto.

   Den un entrevista cu DIARIO, Alexia a splica cu e mes ta esun cu a tuma e iniciativa pa acerca e comision y expresa su deseo di kier participa den certamen di Miss Youth Aruba.  Nunca antes el a yega di concursa den un certamen.  Pues ningun amiga of otro persona a empuhe pa bay participa.  E tabata algo cu e mes tabata desea y asina a bay y inscribi.